އެއްވެސް ޓެކްސްއެއް ބޮޑު ކުރަން އަދި ނިންމައިފައެއް ނެތް: ސަރުކާރު
ޖީއެސްޓީއާއި ޓީ-ޖީއެސްޓީ ބޮޑުކުރަން ސަރުކާރުން ނިންމައިފައިވާ ކަމަށް ދެކެވޭ ވާހަކަތައް ސަރުކާރުން ދޮގުކޮށްފިއެވެ.
ނަން ހާމަނުކުރުމަށް ޝަރުތުކޮށް އޮންލައިން މީޑިއާ "އަވަސް"އަށް ސަރުކާރުގެ އޮފިޝަލަކު ވިދާޅުވީ، އާމްދަނީ ހޯދާނެ ގޮތްތަކެއް ހޯދުމަށް މަޝްވަރާ ކުރަމުންދާ ކަމަށާއި ނަމަވެސް ވަކި ކަހަލަ ޓެކްސްތަކެއް ބޮޑުކުރަން އަމާޒުކޮށްގެން އަދި އެއްވެސް ގޮތްތަކެއް ނިންމައިފައި ނުވާނެ ކަމަށެވެ.
އާންމުންނަށް ވިއްކާ އަސާސީ މުދަލުން ނަގާ ޓެކްސް، ޖީއެސްޓީއާއި ޓޫރިސްޓުން އަތުން ނަގާ ޓެކްސް، ޓީ-ޖީއެސްޓީ ބޮޑު ކުރަން ސަރުކާރުން ކަމާ ގުޅޭ ފަރާތްތަކާ އެކު މަޝްވަރާތައް ފަށާއިވާ ކަމަށް އިއްޔެ ވަނީ ރިޕޯޓްކޮށްފައެވެ.
ސަރުކާރުން ފަށައިފައިވާ މަޝްވަރާތަކުގައި ބައިވެރިވި ފަރާތްތަކާ ހަވާލީދީ މީޑިއާތަކުން ރިޕޯޓްކޮށްފައި ވަނީ ސަރުކާރުން ހުށަހެޅީ އަންނަ އަހަރުގެ އެއްވަނަ ދުވަހުން ފެށިގެން ޖީއެސްޓީ ހަ ޕަސެންޓުން އަށް ޕަސެންޓަށް އަދި ޖީއެސްޓީ 12 ޕަސެންޓުން 16 ޕަސެންޓަށް ބޮޑުކުރަން ކަމަށެވެ.
"އަވަސް"އިން ރިޕޯޓްކޮށްފައި ވަނީ، ޓެކްސް ނިޒާމަށް ބަދަލެއް ގެންނަ ނަމަ އެކަން ކުރާނީ ކަމާ ގުޅޭ ހުރިހައި ފަރާތްތަކެއްގެ ހިޔާލު ހޯދައިގެން ކަމުގައި އޮފިޝަލު ވިދާޅުވި ކަމަށެވެ.
މުދަލާއި ހިދުމަތްތަކުގެ އަގުން ޓެކްސް ނެގުމުގެ ގާނޫނެއް ފާސްކުރީ ކުރީގެ ރައީސް މުހައްމަދު ނަޝީދުގެ ވެރިކަމުގައި 2011ވަނަ އަހަރުއެވެ. ޓެކްސް ނަގަން ފެށުމަކީ އެމްޑީޕީން ޤަބޫލުކުރާ ގޮތުގައި އެ ޕާޓީގެ ސަރުކާރުން ކުރެވުނު ބޮޑު މަސައްކަތެކެވެ.
Ads by STO
