ވަރަށް ފަސޭހައިން ގައިން ގަޔަށް އަރާ ނުރައްކާތެރި ވައިރަހެއް ގާނާއިން ފެނިއްޖެ
ވަރަށް ފަސޭހައިން ގައިން ގަޔަށް އަރާ މާބާގް ވައިރަހަށް ގާނާއިން ދެ މީހަކު ފައްސިވެފައިވާ ކަމަށް ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ)އިން ހާމަކޮށްފިއެވެ.
ޑަބްލިއުއެޗްއޯ އިން ބުނެފައި ވަނީ އެބޯލާ ވައިރަހުގެ ބައެއް ސިފަތައް ހުންނަ މި ބަލި ޖެހިފައިވާކަން އެނގުނީ މަރުވި ދެ މީހަކު ބައްޔަށް ޓެސްޓް ކުރުމުން ކަމަށެވެ. ނަމަވެސް ޔަޤީން ކުރުމަށް ޑަބްލިއުއެޗްއޯގެ ލެބޯޓަރީއަކުން ޓެސްޓްކުރާނެ ކަމަށް ވިދާޅުވިއެވެ.
ގާނާގެ ދެކުނު އަޝާންޓީ ދިރިއުޅެމުން އައި މި ދެ ބަލިމީހުންނަށް ވެސް ހޮސްޕިޓަލުގައި މަރުވުމުގެ ކުރިން ބޭރަށް ހިންގުމާއި ހުމާއި މޭނުބައިކުރުމާއި ހޮޑުލުން ފަދަ އަލާމާތްތައް ފެނިފައިވާ ކަމަށްވެއެވެ.
މިއީ ހުޅަނގު އެފްރިކާގައި މާބާގް ފެތުރޭ ދެވަނަ ފަހަރެވެ. މިދިޔަ އަހަރު މި ވައިރަހުގެ އެއް ވޭދަނަ ގާނާއިން ފެނިފައި ވެއެވެ.
"ބަލި ފެތުރިދާނެ ކަމަށް ބަލާ މިދަނީ ސަލާމަތީ ފިޔަވަޅުތައް އަޅަމުން" ޑަބްލިޔުއެޗްއޯ އިން ނެރުނު ބަޔާނެއްގައި ވިދާޅުވިއެވެ.
މާބާގް ވައިރަސް އާންމުކޮށް ގުޅިފައި ވަނީ ރޫސެޓަސް ވާލާއެވެ. މި ބަލި ފެންނަނީ މި ވާލުތައް ދިރިއުޅޭ ހޮހަޅަތަކަށް ނުވަތަ މައިންތަކަށް ހުށަހެޅުމުންނެވެ.
މި ބަލި ފެށެނީ ކުއްލިއަކަށް، ހުންގަދަވެ، ބޮލުގައި ވަރަށް ބޮޑަށް ރިއްސުމާއި، ނުތަނަވަސް ވުމާއެކުގައެވެ.
ވައިރަސްގެ ވޭދަނަ މެނޭޖްމަންޓަށް ބަލާފައި ވޭތުވެދިޔަ ބަލިތަކުގައި މަރުވާ މީހުންގެ ނިސްބަތް އުޅެނީ ބަލި ޖެހޭ މީހުންގެ 88 އިންސައްތައިގައެވެ. އަދި ވައިރަސްގެ ސްޑްރޭންޑަށް ބަލާ މި އިންސައްތަ 24 އަށް ވެއްޓެއެވެ.
މި ބައްޔަށް ފާސްކޮށްފައިވާ ވެކްސިންތަކެއް ނުވަތަ އެންޓިވައިރަލް ފަރުވާއެއް ނެތް ނަމަވެސް، އަނގައިން ނުވަތަ ލޭހޮޅިތަކަށް ރީހައިޑްރޭޝަން ދިނުމާއި ވަކި އަލާމާތްތަކަށް ފަރުވާ ދިނުމުން ބަލިން ރަނގަޅުވުމުގެ ފުރުސަތު ބޮޑެވެ.
Ads by STO
