ހައްގަށް އުނިކަން އަންނަގޮތަށް ބިދޭސީން ޑީޕޯޓެއް ނުކުރޭ: ފައްޔާޒު
ބިދޭސީންގެ ހައްގުތަކަށް އުނިކަން އަންނަ ގޮތަށް އެއްވެސް ބިދޭސީއަކު ޑީޕޯޓްކޮށްފައި ނުވާނެކަމަށް އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެއެވެ.
ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން މިނިސްޓަރު ފައްޔާޒް ރޭ ވިދާޅުވީ، ބިދޭސީންގެ މައްސަލައަކީ ޒަމާންވީ ބޮޑު މައްސަލައެއް ކަމަށާއި، އެކަމަށް އަވަސް ހައްލުތަކެއް ގެންނަން ޖެހޭ ކަމަށެވެ.
މިނިސްޓަރު ވިދާޅުވީ އިމިގްރޭޝަންގެ ގާނޫނަށް ތަބާނުވާ ބިދޭސީންނާމެދު އަމަލުކުރުމަށް ވަކި ހާއްސަ އުސޫލުތައް އިމިގްރޭޝަންގެ ގާނޫނުގައި ކަނޑައަޅާފައިވާކަމަށެވެ. އެގޮތުން މުޒާހަރާތަކާ ގުޅިގެން ޑީޕޯޓްކުރިކަމަށް ބުނާ ބިދޭސީންނަކީ ވެސް، އެމީހުންގެ ޙައްގުތަކަށް އުނިކަން ނާންނާނެހެން އުސޫލުގެ ތެރެއިން ފޮނުވާލި ބިދޭސީންކަމަށް ފައްޔާޒު ވިދާޅުވިއެވެ.
"އިޙްތިޖާޖްކުރި ބިދޭސީންތަކެއް އިމިގްރޭޝަން ޤާނޫނުގެދަށުން ޑީޕޯޓްކޮށްފައިވާކަމަށް އަޅުގަނޑަށްވެސް މަޢުލޫމާތުލިބިފައިވޭ. ނަމަވެސް އެއީ އިޙުތިޖާޖުކޮށްގެންނޭ ކިޔާފައި ފޮނުވާލި ބައެއް ނޫން. އިޙްތިޖާޖްގެ ނަމުގައި މާރާމާރި ހިންގައި، ތަކެއްޗަށް ގެއްލުންދޭނަމަ އިމިގްރޭޝަން ޤާނޫނުގެ ދަށުން ޑީޕޯޓްކުރާނެ." މިނިސްޓަރު ވިދާޅުވިއެވެ.
ބިދޭސީންގެ މައްސަލައަކީ މި ސަރުކާރުން ހާއްސަ އިސްކަމެއް ދީގެން ހައްލު ކުރުމަށް މަސައްކަތް ކުރަމުން އަންނަ މައްސަލައެއް ކަމަށާއި ބިދޭސީންނާބެހޭ ގަވައިދަށް ގެންނަ އިސްލާހުތަކާއެކު މިހާރު ހުރި ބިދޭސީންގެ ގިނަ މައްސަލަތަކަށް ހައްލެއް ލިބިގެންދާނެ ކަމަށް ފައްޔާޒު ވިދާޅުވިއެވެ.
މިނިސްޓަރު ވިދާޅުވީ، ކޮވިޑް 19ގެ ސަބަބުން ބިދޭސީންގެ މައްސަލައަށް ހައްލެއް ހޯދުމަށް ކުރަމުން އަންނަ މަސައްކަތްތައް ކޮންމެވެސް ވަރަަކަށް މަޑުޖެހިލައިފައިވާ ކަމަށެވެ. އަދި ބިދޭސީން ބައިތިއްބާ ތަންތަނުގެ ހާލަތު ދަށްކަމާއި، އެއްތަނެއްގައި ތޮއްޖެހިގެން އެތައް ބިދޭސީންނެއް ގެންގުޅުމުގެ ސަބަބުން ކޮވިޑް ފެތުރޭ މިންވަރުވެސް އިތުރު ވެ އެކަމުގެ ނޭދެވޭ އަސަރު މުޅި މުޖުތަމައަށް ކުރަމުންދާ ކަމަށް މިނިސްޓަރު ވިދާޅުވިއެވެ.
