ސުޕްރީމް ކޯޓަށް އަލީ ރަޝީދު އާއި ޑރ. މުޙައްމަދު އިބްރާހިމް އައްޔަނު ކުރަން ޖޭއެސްސީ ގެ ލަފަޔަށް އެދިއްޖެ
ކްރިމިނަލް ކޯޓު ހިންގުމާއި ހަވާލުވެ ހުންނެވި އަލީ ރަޝިދު އާއި ޑރ. މުޙައްމަދު އިބްރާހިމް، ސުޕްރީމް ކޯޓަށް އައްޔަނު ކުރުމާއިމެދު ޖުޑީޝަލް ސާވިސް ކޮމިޝަން (ޖޭއެސްސީ) ގެ ލަފައެއް ހޯދުމަށް ރައީސް އިބްރާހިމް މުޙައްމަދު ޞާލިޙު އެދިވަޑައިގެންފިއެވެ.
ރައީސް ޞާލިޙު މިިކަން ހާމަ ކުރައްވާފައިވަނީ މިއަދު ކުރެއްވި ޓްވީޓަކުންނެވެ.
ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް މަގާމުން ސަސްޕެންޑު ކުރުމަށްފަހު، އަލީ ރަޝީދު އާއި އެކޯޓު ހިންގުން ހަވާލު ކުރެއްވީ މިދިޔަ އަހަރުގެ ނޮވެމްބަރު މަހުގެ 5 ވަނަ ދުވަހުގައެވެ.
ކްރިމިނަލް ކޯޓަށް އަލީ ރަޝީދު ބަދަލު ކުރުމުގެ ކުރިން އޭނާ ވަނީ، ކުރީގެ ޖިނާއީ ކޯޓުގައި ގާޒީ ކަމުގެ އިތުރުން ސިވިލް ކޯޓުގެ އިސް ގާޒީކަން ވެސް އަދާ ކުރައްވާފައެވެ. އަދި އިސްގާޒީ ކަމުގައި ހުންނަވައި އަމިއްލަޔަށް އެދިގެން ޑްރަގް ކޯޓަށް ވެސް އޭނާ ބަދަލުވިއެވެ.
ސުޕްރީމު ކޯޓުގައި މިވަގުތު ދެ ފަނޑިޔާރެއްގެ ގޮނޑި ހުރީ ހުސްކޮށެވެ. އެކޯޓުގައި ޖުމްލަ ހަތް ފަނޑިޔާރުން ތިއްބަވަން ޖެހެއެވެ..
