ރީތި ސްކޫލު ހަދައި ނިމެންދެން ކުދިންނާއި މައިންބަފައިން ހާލުގައި ގެންގުޅުމަކީ ރައީސްގެ ވިސްނުންފުޅެއް ނޫން: ރޮޒައިނާ
އެންމެ ރީތި ސްކޫލު ހަދައި ނިމެންދެން ކުދިންނާއި މައިންބަފައިން ހާލުގައި ގެންގުޅުމަކީ ރައީސް އިބްރާހިމް މުޙައްމަދު ޞާލިޙްގެ ވިސްނުންފުޅެއް ނޫންކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
ހުޅުމާލޭ ދެވަނަ ފިޔަވަހީގައި އިއްޔެ ހުޅުވި ''ކާމިލްދީދީ ޕްރައިމަރީ ސްކޫލް'' ހުރި ގޮތުން ވަނީ ސަރުކާރަށް ފާޑުކިޔުން އަމާޒުވެފައެވެ. އެ ގޮތުން ކުރީގެ ނައިބު ރައީސް ޑރ.މުޙައްމަދު ޖަމީލް އަޙްމަދު ވިދާޅުވީ އެތައް ޚަރަދެއްކޮށް އެތައް ދުވަހެއް ފަހުން ހަދިޔާ މިކުރީ ޓިނު ސްކޫލެއް ކަމަށެވެ.
''މި ފެންނަނީ ރައީސް ޞާލިޙް އަދި އެމްޑީޕީގެ ވިސްނުމުގެ ފެންވަރު. އެތައް ޚަރަދެއްކޮށް އެތައް ދުވަހެއް ފަހުން ހަދިޔާ މިކުރީ އެ ޓިނު ސްކޫލް. ކޮތަރުކޮށި އަދިވެސް ފެންނަނީ ވަރަށް ޒަމާނީ އަދި ޗާލުތަނެއްގެ ގޮތުގަ. މި ހާލަތު ބަދަލުވާނީ 2023 ގައި ޞާލިޙުގެ ވެރިކަން ބަދަލުކޮށްގެން.'' ޖަމީލް ވިދާޅުވިއެވެ.
ޖަމީލަށް ރައްދު ދެއްވައި ރޮޒައިނާ ވިދާޅުވީ އެ ސްކޫލު ހުޅުވުމުން ފެނިގެން މިދަނީ އެންމެ ރީތި ސްކޫލު ހަދައި ނިމެންދެން ކުދިންނާއި މައިންބަފައިން ހާލުގައި ގެންގުޅުމަކީ ރައީސް ޞާލިޙްގެ ވިސްނުންފުޅެއް ނޫންކަން ކަމަށެވެ. އަދި އެކަމުން އެނގިގެންދަނީ އެ ކުދިންނަށް ސްކޫލެއް ޢިމާރާތްކޮށްދެވެންދެން ވެސް ކުދިންނަށް ލުއިގޮތެއް ހޯދައިދިނުމުގެ ވިސްނުންފުޅު ރައީސްގެ ކިބައިގައި ހުރިކަން ކަމަށް ރޮޒައިނާ ވިދާޅުވިއެވެ.
Ads by STO
