އަތޮޅުތެރޭގެ އެސްޓީއޯ ފާމަސީތައް އިމާރާތްކުރުމުގެ މަސައްކަތް ކޮށްދޭނެ ފަރާތްތައް ހޯދަނީ
އަތޮޅުތެރޭގައި ހުންނަ އެސްޓީއޯ ފާމަސީތައް އިމާރާތްކުރުމުގެ މަސައްކަތް ކޮށްދޭނެ ފަރާތްތައް ހޯދަން ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)އިން އިއުލާންކޮށްފިއެވެ.
އެސްޓީއޯއިން ވިދާޅުވީ ބ. ކަމަދޫ، ބ. ކުޑަރިކިލު، ކ. މާފުށި އަދި ށ. ބިލެއްފަހީގައި ގާއިމްކުރާ ފާމަސީތައް އިމާރާތްކުރުމުގެ މަސައްކަތް ކޮށްދޭނެ ފަރާތްތަކަށް ފުރުސަތު ހުޅުވާފައިވާ ކަމަށެވެ.
ރަޖިސްޓްރީ ކުރާ ފަރާތްތަކުގައި ހުންނަންޖެހޭ ޝަރުތުތަކުގެ ތެރޭގައި އެ ފަރާތަކީ ފާއިތުވި 5 އަހަރުދުވަހުގެ ތެރޭގައި، 200،000.00ރުފިޔާ އަށް ވުރެ ކުޑަ ނޫން އިމާރާތް ކުރުމުގެ މަސައްކަތެއް ކޮށްފައިވާ ފަރާތަކަށް ވާން ޖެހޭ ކަމަށެވެ.
ތަޖުރިބާ ހުރިކަމަށް ބަލައިގަނެވޭނީ މަސައްކަތް ކޮށްދެވުނު ފަރާތުގެ ރެފަރެންސް ސިޓީ (ޕޮސިޓިވް ރިފަރެންސް) ހުށަހެޅުމުން ކަމަށާއި އެސްޓީއޯއިން ބޭނުންވެއްޖެ ހިނދެއްގައި ކޮށްފައިވާ މަސައްކަތްތައް ވެރިފައި ކުރުމަށް އިތުރު މައުލޫމާތު ހޯދާނެ ކަމަށް އެސްޓީއޯއިން ވިދާޅުވިއެވެ.
މީގެ އިތުރުން ރެފަރެންސް ސިޓީގައި މަސައްކަތުގެ ތަފްސީލް ނެތްނަމަ، ސިޓީއާ އެކު އެ މަސައްކަތުގެ ސަޕޯޓިންގ ޑޮކިއުމަންޓްސް ހުށަހަޅަންވާނެ ކަމަށާއި އަމިއްލަ ފަރާތްތަކުގެ ނަމުގައިހުށަހަޅާ ސިޓީ ބަލައި ނުގަންނާނެ ކަމަށްވެސް އެސްޓީއޯއިން ވިދާޅުވިއެވެ.
ހުށަހަޅާފައިވާ ސިޓީ އާއި ސަޕޯޓިންގ ޑޮކިއުމަންޓްސް ތަކުން މަސައްކަތުގެ ތަފްސީލު އަދި މަސައްކަތް ނިންމި ގޮތް ސާފުކޮށް އެނގެން ނެތްނަމަ އެސިޓީ ބަލައިނުގަތުމުގެ އިޚްތިޔާރު އެސްޓީއޯއަށް ލިބިގެންވެއެވެ.
ރަޖިސްޓަރީ ކުރަން ބޭނުންވާ ފަރާތްތަކުން 19 އޮކްޓޯބަރ 2022 ވަނަ ދުވަހު 1100 ގެ ކުރިން، tenders.sto.mvއަށް އީމެއިލް މެދުވެރިކޮށް ރަޖިސްޓްރީ ކުރެވޭނެއެވެ.
