"ދަ ލީޑަރ އިން މީ" ގެ ނަމުގައި ޕްރޮގްރާމެއް ފަށައިފި
ދަރިވަރުންގެ ގައިގައި ރިވެތި އަޚުލާޤާއި، ދިވެހި އިސްލާމީ މުޖުތަމަޢުއަށް ފައިދާހުރި ކުއްޖަކަށްވުމަށް ބޭނުންވާ އަގުތައް އަށަގެންނެވުމަށް އަމާޒުކޮށް ޚާއްސަ ޕްރޮގްރާމެއް ފަށައިފިއެވެ.
މިއީ އެޑިއުކޭޝަން މިނިސްޓްރީން ބާއްވާ ޕްރޮގްރާމެކެވެ. މި ޕްރޮގްރާމް އިފްތިތާޙުކޮށްދެއްވީ އެކަމަށްޓަކާ ބޭއްވި ޚާއްސަ ރަސްމިއްޔާތުގައި ރައީސުލްޖުމްހޫރިއްޔާގެ ނައިބު ފައިޞަލް ނަސީމެވެ.
ވެލިއު އެޑިއުކޭޝަން ޕްރޮގްރާމް އިފްތިތާޙުކުރުމަށް ތާޖުއްދީން ސްކޫލުގެ ހޯލުގައި މިއަދު ހެނދުނު ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުން ނައިބު ރައީސް ވިދާޅުވީ، ޤައުމީ ލޯތްބާއެކު ޤައުމިއްޔަތު އެއީ ތިމާގެ ކުރިމަތީގައި އޮތް އެންމެ މުހިއްމުކަން ކަން ދަނެގެން އެ މަސައްކަތްކޮށްފިނަމަ ބޮޑު ބަދަލެއް ފެނިގެންދާނެ ކަމަށެވެ.
އަދި ސްކޫލު އުމުރަކީ ތިމާގެ ގައިގައި ރަނގަޅު އަޙްލާޤާއި، ރަނގަޅު ސިފަތައް އަށަގެންނެވުމަށްޓަކާ އެންމެ ރަނގަޅު އުމުރުކަމަށާއި އެޑިއުކޭޝަން މިނިސްޓްރީން އަލަށް މި ފެށި ޕްރޮގްރާމުގެ ފުރިހަމަ ބޭނުން ހިފުމަށް ނައިބު ރައީސް ވަނީ ދަރިވަރުންނަށް އިލްތިމާސްކޮށްފައެވެ.
އެޑިއުކޭޝަން މިނިސްޓްރީން ވިދާޅުވީ "ދަ ލީޑަރ އިން މީ" ގެ ނަމުގައި ދަރިވަރުންގެ ގައިގައި ރިވެތި އަޚްލާޤާއި ދިވެހި އިސްލާމީ މުޖުތަމަޢުއަށް ފައިދާހުރި ކުއްޖަކަށްވުމަށް ބޭނުންވާ އަގުތައް އަށަގެންނެވުމަށް އަމާޒުކޮށް ފެށި މިޕްރޮގްރާމް އަމާޒުކޮށްފައިވަނީ ރާއްޖޭގެ ސްކޫލުތަކުގެ ގްރޭޑް 9-12 ގެ ދަރިވަރުންނަށް ކަމަށެވެ.
މި މި ޕްރޮގްރާމްގެ ސެޝަންތައް ފެސިލިޓޭޓް ކޮށްދެއްވަނީ ރާއްޖޭގައި ފާހަގަކޮށްލެވޭ ވާހަކަދެއްކުންތެރިން އަދި ލައިފް ކޯޗުން ކަމަށްވާ އަލްފާޟިލް މަސްޢޫދު ޢަލީ އަދި އަލްފާޟިލް ޙުސައިން އަފީފް ކަމަށް މިނިސްޓްރީން ވިދާޅުވިއެވެ.
