ޑްރަގް އޮޕަރޭޝަނެއްގައި ހައްޔަރު ކުރި މީހަކަށް އަނިޔާކޮށް، މަރާލި ކަމަށްބުނެ މަޑަވެލީ ރައްޔިތުން މުޒާހަރާއަށް
ޑްރަގް އޮޕަރޭޝަނެއްގައި ހައްޔަރު ކުރި މީހަކަށް އަނިޔާކޮށް، މަރާލި ކަމަށްބުނެ ގދ. މަޑަވެލީ ރައްޔިތުން މުޒާހަރާއަށް ނިކުމެއްޖެއެވެ.
މައުލޫމާތު ލިބިފައިވާ ގޮތުގައި ނިޔާވެފައިވަނީ މިއަދު މެންދުރު ފުލުހުންގެ ޑްރަގް އެންފޯސްމެންޓް ޑިޕާޓްމެންޓުން ހިންގި އޮޕަރޭޝަނެއްގައި ގދ. ހޯޑެއްދޫއިން ހައްޔަރު ކުރި މީހެކެވެ. އެމީހާގެ ހަށިގަނޑު މަޑެވެއްޔަށް ގެންގޮސްފައިވާ ކަމަށް މައުލޫޫމާތު ލިބެއެވެ. ފުލުހުންގެ ލޯންޗުން އެމީހާ އެންބިއުލެންސަށް އަރުވާ މަންޒަރު ފެންނަ ވީޑިއޯއެއް މީސްމީޑިއާގައި ދަނީ ދައުރުވަމުންނެވެ.
ގިނަ ބަޔަކު މިހާރު މަޑަވެލި ހެލްތު ސެންޓަރު ކައިރިއަށް އެއްވެފައިވާއިރު, އެ މީހުން ބުނަމުންދަނީ އެ މީހާ މަރުވީ، ހައްޔަރުގައި ދިން އަނިޔާތަކުގެ ސަބަބުން ކަމަށެވެ.
މިކަމާ ގުޅިގެން ފުލުހުން ވިދާޅުވީ، މިއަދު ފުލުހުންގެ ބެލުމުގެ ދަށަށް ގެނައި މީހަކު، މެޔަށް ތަދެއް އަރައި ސީޒާއެއް ޖެހުން ފަދަ އަލާމާތްތަކެއް ފެނިގެން މަޑެވެލީ ހެލްތް ސެންޓަރަށް ގެންގޮސްފައިވާ ކަމަށެވެ. އަދި ގެންދިޔައިރު ވެސް ނިޔާވެފައިވާ ކަމަށް ފުލުހުން ބުނެއެވެ.
މިހާދިސާ ނޭޝަނަލް އިންޓަގްރިޓީ ކޮމިޝަނާއި ހިއުމަން ރައިޓްސް ކޮމިޝަންއާ ހިއްސާކޮށްފައިވާ ކަމަށް ވެސް ފުލުހުން ވިދާޅުވެއެވެ.
Ads by STO
