އިންޑިއާއަށް ބޭސްފަރުވާ އަށް ދިޔަ ދެ ދިވެއްސަކު ކޮވިޑަށް ފައްސިވެއްޖެ
އިންޑިއާއަށް ބޭސް ފަރުވާއަށް ދިޔަ އިތުރު 2 ދިވެއްސަކު ކޮވިޑް-19 އަށް ފައްސި ވެއްޖެއެވެ.
ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަ ދައްކަވަމުން އާސަންދަ ކުންފުނީގެ އެސިސްޓެންޓް މެނޭޖިން ޑިރެކްޓަރު އިބްރާހިމް ރަޝީދު ވިދާޅުވީ، އެ ކުންފުނީގެ ހަރަދުގައި އިންޑިއާއަށް ބޭސްފަރުވާއަށް ގޮސް ރާއްޖެ އައުމުގެ ކުރިން ހެދި ކޮވިޑް ޓެސްޓް ޕޮޒިޓިވްވުމުން ދެ މީހުން އެ ގައުމުގައި ކަރަންޓީނު ކޮށްފައިވާ ކަމަށެވެ.
އޭނާ ވިދާޅުވި ގޮތުގައި ފައްސިވެފައި ވަނީ އެ ހޮސްޕިޓަލަށް ދިޔަ ދިވެހިން ގެތެރެއިން ބަލިމީހަކާއި އެހެން ދިވެހި ބަލި މީހެއްގެ އެހީތެރިއެއް ކަމަށެވެ.
އިބްރާހިމް ރަޝީދު ވިދާޅުވީ ޕްރޮޓޮކޯލް އޮންނަ ގޮތުން އިންޑިއާ އަށް ދެވެނީ ކޮވިޑަށް ޓެސްޓް ކޮށް ނަތީޖާ ނައްސިވާ ފަރާތްތަކަށް ކަމަށެވެ. އަދި އެ ގައުމަށް ގޮސް ކޮވިޑަށް ޓެސްޓް ކުރަން ޖެހޭއިރު އެނބުރި ރާއްޖެ އައުމުގެ ކުރިން ވެސް ކޮވިޑަށް ޓެސްޓް ކުރަން ޖެހޭނެ ކަމަށް އޭނާ ވިދާޅުވި އެވެ.
މިދިޔަ މަހުގެ 14 ވަނަ ދުވަހު އަމްރީތާ ހޮސްޕިޓަލަށް ދިޔަ ހަތަރު ދިވެއްސަކު ވަނީ ކޮވިޑަށް ފައްސިވެފައެވެ. އޭގެ ތެރެއިން ތިން މީހަކު ބަލިން ރަނގަޅުވެފައިވާ ކަމަށް އާސަންދައިން ބުނެއެވެ.
