ދެ ރަށެއްގައި ބައި އިލެކްޝަނުގެ ވޯޓުލުން ކުރިއަށް
ދެރަށެއްގެ ބައި-އިލެކްޝަނުގެ ވޯޓުލުން ފަށައިގެން އެބަ ކުރިއަށް ދެއެވެ.
މި އިންތިޚާބުތައް މި ބާއްވަނީ، ނ.މަގޫދޫގެ ކައުންސިލަށް އަންހެން މެމްބަރަކު އިންތިޚާބު ކުރުމަށާއި، ލ.ކަލައިދޫ ޑަބްލިޔުޑީސީއަށް މެމްބަރަކު ހޮވުމުގެ ގޮތުންނެވެ.
މި ދެ ބައި-އިލެކްޝަނުގެ ވޯޓުލުން މިއަދު ހެނދުނު 8:00ގައި ފަށާފައިވާއިރު، ހަވީރު 4:00އަށް ވޯޓުލުން ކުރިއަށްދާނެއެވެ.
މި ދެ އިންތިޚާބުގެ ވޯޓު ފޮށިތައް، މާލޭގެ އިމާދުއްދީން ސްކޫލުގައިވެސް ވަނީ ބަހައްޓައިފައެވެ.
ޑަބްލިޔުޑީސީތަކުގެ ގިނަ ބައި-އިލެކްޝަންތަކެއް ބާއްވަމުން އަންނައިރު، ލާމަރުކަޒީ ޤާނޫނުގެ 56 ވަނަ މާއްދާގެ 6 ގެ (އ) ގައި ބުނާގޮތުން ޑަބްލިއުޑީސީން މެންބަރެއްގެ މަޤާމު ހުސްވެއްޖެނަމަ، 14 ދުވަހުގެ ތެރޭގައި ލޯކަލް ގަވަމަންޓް އޮތޯރިޓީ (އެލްޖީއޭ) އިން އިލެކްޝަންސް ކޮމިޝަން (އީސީ)އަށް އަންގަން ވާނެއެވެ.
އެކަން އަންގާ ތާރީޚުން ފެށިގެން 60 ދުވަހުގެ ތެރޭގައި އެ ޑަބްލިއުޑީސީއަކަށް މެންބަރަކު އިންތިހާބު ކުރަންވާނެއެވެ. އަވަސް އަވަހަށް ޑަބްލިއުޑީސީ ތަކުގެ ބައި އިލެކްޝަން ބާއްވަން ޖެހިފައި ވަނީ އެ ކޮމިޓީތަކަށް އިންތިހާބުވާ ފަރާތްތައް އިސްތިއުފާދޭތީއެވެ.
