ބޮޑު ސަރަހައްދަކަށް އުދައިގެ އަސަރު ކޮށްފާނެ
ރާއްޖޭގެ ބޮޑު ސަރަހައްދަކަށް އުދައަރާފާނެ ކަމަށް ލަފާކޮށް މޫސުމާ ބެހޭ ޤައުމީ އިދާރާއިން ވައިޓް އެލާޓް ނެރުއްވައިފިއެވެ.
މި އެލާޓް ނެރުއްވައިފައިވަނީ ކ. އަތޮޅުން ފެށިގެން އައްޑޫސިޓީއާއި ދެމެދުގެ ސަރަހައްދަށެވެ. އެލާޓްގެ ވަގުތަކީ ހެނދުނު 08:45 އިން ފެށިގެން މެންދުރު 01:30 އާ ހަމައަށެވެ.
މެޓް އޮފީހުން ވިދާޅުވީ މިވަގުތުގައި އެލާޓް ނެރެފައިވާ ސަރަހައްދަށް އުދަ އެރުމަކީ އެކަށީގެންވާ ކަމެއް ކަމަށާއި، މެދުރާއްޖެތެރޭގެ އެކި ހިސާބަށް ވިއްސާރަ ކުރާނެ ކަމަށެވެ.
އަދި ގުގުރުންވެސް އެކަށީގެންވާ ކަމަށާއި، ރާއްޖޭގެ ދެކުނާއި މެދުރާއްޖެތެރޭގައި ކަނޑުތައް އާދައިގެވަރަކަށް ގަދަވާނެ ކަމަށްވެސް މެޓުން ލަފާ ކުރައްވައެވެ.
ވެރިރަށް މާލެއަށް އުދަ އެރުމުގެ ސަބަބުން، ކާނިވާ ސަރަހައްދުގައިވެސް ވަނީ ފެންބޮޑުވެފައެވެ. އެ ސަރަހައްދުގައި ހުރި ރެސްޓޯރަންޓަކަށް އުދައިގެ އަސަރު ކޮށްފައިވާ މަންޒަރު ފެންނަ ވީޑިއޯއެއް މީސްމީޑިއާގައި ދަނީ ދައުރުވަމުންނެވެ. ކާނިވާ ސަަރަހައްދަކީ އާންމުކޮށް އުދައިގެ އަސަރު ކުރާ ސަަރަހައްދެކެވެ.
