ކޮޕް 27 ގައި ނަޝީދު ލަންކާ ތަމްސީލު ކުރައްވާތީ ރޮޒައިނާ ފާޑުވިދާޅުވެއްޖެ
ސްރީލަންކާގެ ޤައުމީ ވަފްދުގެ މެންބަރެއްގެ ގޮތުގައި ކޮޕް 27 ގައި ބައިވެރިވެވަޑައިގަތުމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު މިޞްރަށް ވަޑައިގަތުމުން ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ ފާޑުވިދާޅުވެއްޖެއެވެ.
ބަންޑާރަ ނައިބު އިބްރާހިމް ރިފްޢަތު ޓެގްކުރައްވައި ރޮޒައިނާ ކުރެއްވި ޓްވީޓެއްގައި ވަނީ ރާއްޖޭގެ ރައްޔިތުންގެ މަޖިލީހުގެ ރައީސަށް ރާއްޖެ ބައިވެރިވާ ފޯރަމެއްގައި އެހެން ޤައުމެއް ތަމްސީލު ކުރެވިދާނެތޯ ސުވާލު ކުރައްވައިފައެވެ. އަދި އެއީ ކުރެވިދާނެ ކަމެއް ކަމަށް ބުއްދި ޤަބޫލު ނުކުރާކަމަށް ވެސް ރޮޒައިނާ ވިދާޅުވިއެވެ.
އޭނާ ވިދާޅުވީ މަޖިލީހުން އެއްވެސް ޚަރަދެއް ނުކުރަމޭ ބުނުމަކުން މިކަން އަދި ހައްލެއްނުވާނެ ކަމަށެވެ.
''އިރުކޮޅަކުން އަޅުގަނޑުމެންގެ ރައީސުލްޖުމްހޫރިއްޔާ ވެސް ވަޑައިގަންނަވަންވީ ދެއްތޯ ޔޫ.އެން އަށް ސްރީލަންކާ ތަމްސީލުކުރަން. ދެން ރައީސް އޮފީހުން ޚަރަދެއް ނުކުރަމޭ ބުނީމަ ނިމުނީ. މީ ކޮންކަހަލަ ކަމެއް.'' ރޮޒައިނާ ވިދާޅުވިއެވެ.
ކޮޕް 27 ގައި ނަޝީދު ލަންކާ ތަމްސީލު ކުރައްވާތީ ކުރީގެ ބަންޑާރަ ނައިބު ޑރ.މުޙައްމަދު މުނައްވަރު ވެސް ވަނީ ފާޑުވިދާޅުވެފައެވެ.
އޭނާ ކުރެއްވި ޓުވީޓެއްގައި ވަނީ ދިވެހިރާއްޖޭގެ ރައްޔިތުންގެ މަޖިލީހުގެ ރައީސް ދިވެހި ރައްޔިތުންގެ ފައިސާއިން މުސާރަ ނަންގަވައިގެން އެހެން ޤައުމެއްގެ ވަފުދުގައި އެ ޤައުމު ތަމްސީލު ކުރައްވަން ވަޑައިގަތުމުން ސުވާލު އުފައްދަވައިފައެވެ. އަދި ދިވެހި ޤައުމު ކޮބައިތޯއާއި ދިވެހި ދައުލަތަށް ވަފާތެރިވުމަކީ ކޮބައިތޯ ވެސް އޭނާ ވަނީ ސުވާލު ކުރައްވައިފައެވެ.
ކޮޕް 27 ގައި ރައީސް ނަޝީދު ލަންކާ ތަމްސީލު ކުރައްވާއިރު, ދިވެހި ވަފުދުގައި އިސްކޮށް ހުންނެވީ ނައިބު ރައީސް ފައިސަލް ނަސީމެވެ.
