އެޗްޕީއޭގެ މިންގަނޑުތަކަށް ނުފެތޭ 15 ތަނެއް ބަންދު ކޮށްފި
ފެތުރެމުން އަންނަ ކޮވިޑް-19 އިން ރައްކާތެެރިވުމުގެ ގޮތުން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ކަނޑައަޅާފައިވާ މިންގަނޑުތަކަށް ނުފެތޭ 15 ތަނެއް އިއްޔެ ބަންދު ކޮށްފިއެވެ.
ފުރަބަންދަށްފަހު ކެފޭ، ރެސްޓޯރަންޓް އަދި ހޮޓާފަދަ ތަންތަން އަލުން ހުޅުވުމުގެ ހުއްދަ އެޗްޕީއޭ އިން ވަނީ ދީފައެވެ. ނަމަވެސް އެތަންތަނުގެ ހާލަތު ހުރިގޮތާއި، އެއެޖެންސީން ކަނޑައަޅާފައިވާ ޤަވާއިދުތަކާއި މިންގަނޑުތަކަށް ފެތޭތޯވެސް ދަނީ ބަލަމުންނެވެ.
އެގޮތުން ކެފޭ، ޖިމް ފަދަ ތަންތަން އިންސްޕެކްޓު ކުރުމުގެ މަސައްކަތް އެޗްޕީއޭއިން އަންނަނީ ކުރަމުން އަންނައިރު، ފުރަތަމަ އިންސްޕެކްޝަނުގައި މާލޭގެ ފިހާރަ، ސެލޫން އަދި ކެފޭ ފަދަ ހުރިހާ ތަނަކަށް ގޮސް ކޮވިޑުގެ އުސޫލުތަކާ އެއްގޮތަށް ހުރި ތަންތަން ބަލައި، އުސޫލުތަކަށް ނުފެތޭ ކަންކަން ވަނީ ކިޔައިދީފަ އެވެ.
އެއަށްފަހު މިންގަނޑަށް ނުފެތޭ ތަންތަން ވަގުތީގޮތުން ބަންދުކުރުމުގެ މަސައްކަތް ވެސް ދަނީ އެޗްޕީއޭއިން ކުރަމުންނެވެ.
އިއްޔެ އެޗްޕީއޭ އިން ވަނީ ކެފޭ/ރެސްޓޯރަންޓު ގެ 6 ތަނަކާއި، 6 ފިހާރައެއްގެ އިތުރުން ސެލޫން/ބޯކޮށާ ތަނުގެ 3 ތަނެއް ވަގުތީ ގޮތުން ބަންދު ކޮށްފައެވެ.
އެޗްޕީއޭގެ މިންގަނޑުތަކަށް ފެތޭތޯ އިއްޔެ އެޖެންސީން ވަނީ ޖުމްލަ 111 ތަނެއް ބަލާފާސްކޮށްފައެވެ.
