ނަޝީދުގެ މުސާރަ ކަނޑައި ޗާޓުގެ ތެރެއަށް ގެންނަންޖެހޭ: ޑރ.ޖަމީލު
ރައްޔިތުން މަޖިލީހުގެ ރައީސް މުޙައްމަދު ނަޝީދު ސްރީލަންކާގެ ޤައުމީ ވަފުދުގެ މެންބަރެއްގެ ގޮތުގައި ކޮޕް 27 ތަމްސީލު ކުރައްވާތީ ކުރީގެ ނައިބު ރައީސް ޑރ.މުޙައްމަދު ޖަމީލު ފާޑުވިދާޅުވެއްޖެއެވެ.
ރޭގެ ވަގުތެއްގައި ޑރ.ޖަމީލް ކުރެއްވި ޓުވީޓުގައި ވިދާޅުވީ އެމްޑީޕީގެ ލީޑަޝިޕްގައި ތިއްބެވީ، ވެރިކަމަކީ ސަމާސާއެއް ކަމުގައި ދެކެވަޑައިގަންނަވާ ދެ ބޭފުޅުން ކަމަށެވެ. އޭގެތެރެއިން ރައީސް އިބްރާހީމް މުޙައްމަދު ޞާލިޙަކީ ނާގާބިލު ކަމާއި ޤައުމު ހަފުސްކޮށްލުމުގެ ނަމޫނާ ކަމަށް ވެސް ޖަމީލު ވިދާޅުވިއެވެ.
ދެން ހުންނެވި ރައީސް ނަޝީދު ވަނީ ރައްޔިތުންގެ މުސާރައިގައި އެހެން ޤައުމަކަށް މަސައްކަތް ކޮށްދެއްވަން ވަޑައިގެންކަން ފާހަގަކުރައްވައި ޖަމީލު އިތުރަށް ވިދާޅުވީ ނަޝީދުގެ މުސާރަ ކަނޑައި ޗާޓުގެ ތެރެއަށް ގެންނަންޖެހޭ ކަމަށެވެ.
ލަންކާގެ ޤައުމީ ވަފުދުގެ މެންބަރެއްގެ ގޮތުގައި ކޮޕް 27 ތަމްސީލު ކުރެއްވުމަށް ރައީސް ނަޝީދު މިޞްރަށް ވަޑައިގަތުމާ ގުޅިގެން ބައެއް ސިޔާސީ ބޭފުޅުންނާއި ބައެއް ޕާޓީތަކުގެ ފާޑުކިޔުން ވެސް އަމާޒުވެފައިވެއެވެ.
ރައީސް މައުމޫން ޢަބްދުލްޤައްޔޫމުގެ އެމްއާރްއެމުން އިއްޔެ ނެރުއްވި ބަޔާނެއްގައި ވިދާޅުވީ، ނަޝީދު ކުރެއްވީ ޤާނޫނު އަސާސީގެ 75 ވަނަ މާއްދާއާއި ރައްޔިތުންގެ މަޖިލީހުގެ ގަވާއިދުގެ ރޫހާ ޚިލާފު ކަމެއް ކަމަށެވެ. އަދި މަޖިލީހުގެ ރައީސް ގެ މަސްއޫލިއްޔަތުތަކަށް އޮޅުން އަރާ, ސުލޫކީ މިންގަނޑުތަކާ ޚިލާފު އަމަލެއް ކަމަށް ވެސް އެ ޕާޓީން ފާހަގަކުރިއެވެ.
އެ ޕާޓީން އިތުރަށް ވިދާޅުވި ގޮތުގައި ރާއްޖެއިން ވެސް ބައިވެރިވާ ބައިނަލްއަޤްވާމީ ކޮންފަރެންސެއްގައި އެހެން ޤައުމެއްގެ މަންދޫބެއްގެ ގޮތުގައި ނަޝީދު ވަޑައިގަތުމަކީ އެ މަނިކުފާނުގެ ހިތްޕުޅުގައި ރާއްޖެއަށް އޮތް ޤަދަރު ކުޑަކަން ހާމަކޮށްދޭ ކަމެކެވެ.
