ކުލި ނުދައްކާ ދެ ފްލެޓެއްގެ އެއްބަސްވުން އުވާލައި، ތަން ހުސްކުރަން އަންގައިފި

ފަހި ދިރިއުޅުން ކޯޕަރޭޝަން (އެފްޑީސީ)އިން ހުޅުމާލޭގައި ތަރައްޤީކޮށްފައިވާ އަމާން ޓަވަރުތަކުގެ ތެރެއިން ދެ ފްލެޓެއްގެ ކުލި އެތައް މަހެއް ވަންދެން ނުދައްކާ ހުރުމުގެ ސަބަބުން، އެ ތަންތަނުގެ އެއްބަސްވުން މިއަދު ބާތިލުކޮށް 15 ދުވަހުގެ ތެރޭގައި ތަން ހުސްކުރުމަށް އަންގައިފިއެވެ.

އެ ކޯޕަރޭޝަނުން މައުލޫމާތު ދިން ގޮތުގައި، 4،000 ހައުސިންގ ޔުނިޓް މަޝްރޫޢުގެ ދަށުން ދޫކޮށްފައިވާ މި ތަންތަނުގެ އެއްބަސްވުންތައް އުވާލާފައި ވަނީ ކުއްޔަށް ދިނުމާއި މިލްކުކުރުމުގެ އުސޫލުތަކާ އެއްގޮތްވާ ގޮތުގެ މަތިންނެވެ. ފައިސާ ނުދައްކާ ހުރި ފަރާތްތަކަށް އެކަން ހައްލުކުރުމަށް 135 ދުވަހުގެ ދިގު މުއްދަތެއް ދިނުމަށް ފަހު، އަދި ދެ ފަހަރެއްގެ މަތިން އިންޒާރުގެ ނޯޓިސް ފޮނުވުމަށް ފަހު ވެސް ކުލި ދައްކާފައި ނުވާތީ، އެންމެ ފަހުގެ ފިޔަވަޅެއްގެ ގޮތުން އެއްބަސްވުން ނިމުމަކަށް ގެނައުމަށް 30 ދުވަހުގެ ނޯޓިހެއް ދީފައިވާނެކަން އެފްޑީސީން ފާހަގަކުރިއެވެ.

ފައިސާ ހަލާސްކުރުމަށް އެކަށީގެންވާ ވަގުތު ދިނުމަށް ފަހު، އެކި ވަސީލަތްތައް މެދުވެރިކޮށް އެ ފަރާތްތަކާ ވަނީ މުއާމަލާތްކޮށްފައެވެ. އޭގެ ތެރޭގައި ފަހި ޕޯޓަލް، އެސްއެމްއެސް، އީމެއިލް އަދި ރަސްމީ ލިޔުމުން ނޯޓިސް ފޮނުވުން ހިމެނެއެވެ. ނަމަވެސް އެއްވެސް ކުރިއެރުމެއް ނުލިބުމުން، އެއްބަސްވުން އުވާލައި، އެ ފަރާތްތަކަށް އެފްޑީސީ ޕޯޓަލްއަށް ނުވަދެވޭ ގޮތަށް މިހާރު ވަނީ އެކްސެސް ކަނޑާލާފައެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ހުޅުމާލޭގައި އިމާރާތްކޮށްފައިވާ "އަމާން ދޯދި" އަދި "އަމާން އުދަރެސް" ޓަވަރުތަކުން ފްލެޓް ލިބުނު މީހުންގެ ތެރެއިން 500 އަށްވުރެ ގިނަ އާއިލާއިން ޤަވާއިދުން ކުލި ނުދައްކާކަމުގެ ކަންބޮޑުވުން އެ ކޯޕަރޭޝަނުން ވަނީ މީގެ ކުރިން ވެސް ފާޅުކޮށްފައެވެ.