ޓެރެރިޒަމް އޮޕަރޭޝަންގެ ތެރެއިން ބާރުގަދަ ގޮވުންތައް ގޮއްވާ މާއްދާއެއް ފެނިއްޖެ
ޓެރެރިޒަމްއާ ދެކޮޅަށް ދިވެހި ފުލުހުންގެ ޚިދުމަތާއި މޯލްޑިވްސް ނެޝަނަލް ޑިފެންސް ފޯސް ގުޅިގެން މިހާރު ކުރިއަށް ގެންދާ އޮޕަރޭޝަންގައި, ބަލާ ފާސްކުރި ގެޔަކުން ބާރުގަދަ ގޮއްވުންތަކަށް ބޭނުންކުރެވިދާނެ މާއްދާތަކެއް ފެނިއްޖެ ކަމަށް ފުލުހުން ވިދާޅުވެއްޖެއެވެ.
ފުލުހުން ވަނީ މި އޮޕަރޭޝަން މާލެ އާއި ކ. ގުރައިދޫ، އަދި އައްޑޫގައި ކުރިއަށް ގެންގޮސްފައެވެ. އޮޕަރޭޝަންގެ ބައެއް ތަފްސީލް ފުލުހުން މިރޭ ނެރުނު ނޫސްބަޔާނުގައި ހިއްސާކުރެއްވިއެވެ.
މި އޮޕަރޭޝަނުގެ ތެރެއިން މިހާތަނަށް 14 މީހަކު ހައްޔަރު ކޮށްފައިވާއިރު، އެ އެންމެން ވެސް ތިބީ މިހާރު ފުލުހުންގެ ބަންދުގައެވެ.
ފުލުހުުން ވިދާޅުވީ، އެފަރާތްތައް ދިރިއުޅޭ ގެއެއް ބަލައި ފާސްކޮށް ނެގުނު އެކްސްޕްލޯސިވް ކެމިކަލް ކަމަށް ޝައްކު ކުރެވޭ ތިން ބާވަތެއްގެ ސާމްޕަލް އެމްއެންޑީއެފްގެ އެކްސްޕްލޯސިވް އޯޑްނަންސް ޑިސްޕޯސަލް (އީއޯޑީ)ގެ ފަރާތުން ޗެކް ކުރުމުން އެ ސާމްޕަލްތަކުގައި ހައި އެކްސްޕްލޯވިސް ކަން އެނގިފައިވާ ކަމަށެވެ.
ފުލުހުން ވިދާޅުވީ، ފެނުނު ވައްތަރުތަކުގެ އެކްސްޕްލޯސިވްސްގެ މަދު މިންވަރަކުން އިންސާނުންގެ ފުރާނައާއި، މުދަލަށް ބޮޑެތި ގެއްލުން ދެވިދާނެ ކަމަށް އެމްއެންޑީއެފް އީއޯޑީއިން މައުލޫމާތު ދީފައިވާ ކަމަށެވެ.
