އެމްއެންޑީއެފްގެ ޕެރޭޑްތަކެއް، ތޮއްޑުއާ އުކުޅަހުގައި
މިއަދާއި މާދަމާ އއ. ތޮއްޑޫއާ އެ އަތޮޅު އުކުޅަހުގައި ޕެރޭޑު ބާއްވަން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ނިންމަވައިފިއެވެ.
އެމްއެންޑީއެފުން ވިދާޅުވީ، މި ޕެރޭޑަކީ އއ.ތޮއްޑޫ ސްކޫލަށް 55 އަހަރު ފުރުމުގެ މުނާސަބަތުގައި، އެ ރަށުގެ ކައުންސިލުގެ އެދުމަކަށް ބާއްވާ ޕެރޭޑެއް ކަމަށެވެ.
މިއަދު ތޮއްޑޫގައި ބާއްވާ ޕެރޭޑަށްފަހު ހޮނިހިރު ދުވަހު އުކުޅަހުގައި ޕެރޭޑު ބާއްވަން ހަމަޖެހިފައިވާއިރު، މިއީ ވެސް އެރަށު ކައުންސިލްގެ އެދުމުގެ މަތިން ބާއްވާ ޕެރޭޑެއް ކަމަށް އެމްއެންޑީއެފުން މަޢުލޫމާތު ދެއްވައެވެ.
މި ދެ ރަށުގައި ޕެރޭޑް ފެށުމަށް ހަމަޖެހިފައިވަނީ އެ ދުވަހެއްގެ ހަވީރު 16:30 ގައެވެ. މި ޕެރޭޑްގެ ތެރެއިން، އެމްއެންޑީއެފް އާޓްސް އެންޑް ސެރެމޯނިއަލް ސަރވިސްގެ މިލިޓަރީ ބޭންޑުން ރާގު ކުޅޭނެއެވެ.
ތޮއްޑުއާ އުކުޅަހުގައި ޕެރޭޑް ކުރިއަށްގެންދާއިރު، މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީއާއި އެމްއެންޑީއެފްގެ ލީޑަރޝިޕުން އެ ދެ ރަށަށް ވަޑައިގެން، ޕެރޭޑް ބައްލަވާލެއްވުމަށް ވަނީ ހަމަޖެހިފައެވެ.
