ޓެރަރިޒަމްގެ އޮޕަރޭޝަން: އައްޑޫން ހައްޔަރުކުރި އެކަކު ހައިކޯޓުން މިނިވަންކޮށްފި
ފުލުހުންނާއި މޯލްޑިވްސް ނެޝަނަލް ޑިފެންސް ފޯސް ގުޅިގެން ހިންގި ކައުންޓަރ ޓެރަރިޒަމް އޮޕަރޭޝަނުގައި އައްޑޫ ސިޓީން ހައްޔަރުކުރި މީހަކާ ދެކޮޅަށް އެކަށީގެންވާ ވަރަށް ހެކި ނެތުމުން ހައިކޯޓުން މިއަދު އޭނާ ދޫކޮށްލައިފިއެވެ.
މިދިޔަ މަހުގައި މާލެއާއި އައްޑޫ ސިޓީއާއި އައްޑޫ ސިޓީގެ ކަނޑުގެ ސަރަހައްދުގައި ހިންގި މި އޮޕަރޭޝަނުގައި 14 މީހަކު ހައްޔަރުކުރިއެވެ.
އެ މައްސަލައިގައި ހައްޔަރުކޮށް ޝަރީޢަތް ނިމެންދެން ބަންދުކުރި މީހުންގެތެރެއިން އެކަކު ބަންދުކުރަން މަރަދޫފޭދޫ ކޯޓުން ނެރުއްވި ޢަމުރު އޭނާގެ ފަރާތުން ހައިކޯޓުގައި އިސްތިއުނާފު ކުރިއެވެ. ހައިކޯޓުން މިއަދު ކުރެއްވި ޙުކުމުގައިވަނީ އޭނާއާ ދެކޮޅަށް އިންޓެލިޖެންސް ރިޕޯޓެއް ހުށަހެޅުއްވުން ފިޔަވައި އިތުރު އެެއްވެސް ހެއްކެއް ފުލުހުން ހުށަހަޅުއްވާފައިނުވާ ކަމަށެވެ. އަދި އެ ރިޕޯޓުގައި ހުރި ވާހަކަތަކަށް ބުރަދަނެއް ލިބޭ އިތުރު އެއްވެސް ހެއްކެއް ވެސް ފުލުހުން ހުށަހަޅުއްވާފައިނުވާ ކަމުގައެވެ.
އިންޓެލިޖެންސް ރިޕޯޓުގައި ހިމެނޭ ކަންކަމަށް ބާރުދޭ އެއްވެސް ޤަރީނާއެއް ލިޖެންސް ރިޕޯޓާއެކު ހިމެނިފައިނުވާއިރު ހަމައެކަނި އެ ރިޕޯޓުގެ މައްޗަށް ބިނާކޮށް ޝަރީޢަތް ނިމެންދެން ބަންދުގައި ބެހެއްޓުމަށް ބޭނުންވާ އެކަށީގެންވާ މިންވަރަށް ހެކި ލިބިފައިވާކަމަށް ދަށުކޯޓުން ކަނޑައަޅާފައިވަނީ ރަނގަޅަށް ކަމުގައި ނުދެކެމެވެ.
އެހެންވެ ތިން ފަނޑިޔާރުންގެ އިއްތިފާޤުން ޙުކުމް ކުރެއްވީ މަރަދޫފޭދޫ ކޯޓުގެ ޢަމުރު ބާތިލު ކަމަށެވެ.
Ads by STO
