ޓިބެޓްގައި ހައްގުތަކަށް އަރައިގަތް ކަމަށް ބުނެ އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކަށް ޗައިނާއިން ފާޑުކިޔައިފި
ޓިބެޓްގައި އިންސާނީ ހައްގުތަކަށް އަރައިގަތް ކަމަށް ތުހުމަތުކުރެވޭ ޗައިނާގެ އިސް ދެ އޮފިޝަލަކާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކަކީ ގާނޫނާ ހިލާފު އަދި ޗައިނާ-އެމެރިކާއަށް ބޮޑެތި ގެއްލުންތަކެއް ލިބުނު ދަތިކުރުމުގެ ފިޔަވަޅުތަކެއް ކަމަށް ޗައިނާގެ ޚާރިޖީ ވުޒާރާއިން ހޯމަ ދުވަހު ނެރުނު ބަޔާނެއްގައި ބުނެފައެވެ.
ނަސްލީ ޚިޔާލުތަފާތުވުންތައް ނައްތާލުމަށާއި، ޓިބެޓްގެ ހިމަލަޔާ ސަރަޙައްދުގައި ދީނީ ހަރަކާތްތައް ކޮންޓްރޯލް ކުރުމަށް ހަރުކަށި ސިޔާސަތުތަކެއް ބޭނުންކޮށްފައިވާ ކަމަށް ކުރެވޭ ތުހުމަތުތައް ޗައިނާއިން އަބަދު ވެސް ދޮގު ކުރެއެވެ.
2016 ވަނަ އަހަރުން ފެށިގެން 2021 ވަނަ އަހަރާ ދެމެދު ޓިބެޓްގައި ވެރިކަން ކުރާ ކޮމިއުނިސްޓް ޕާޓީގެ ވެރިޔާ ވޫ ޔިންގްޖީ އާއި އެ ސަރަހައްދުގެ ޕަބްލިކް ސެކިއުރިޓީގެ އިސް އޮފިޝަލެއް ކަމަށްވާ ޒަންގް ހޮންގްބޯއާ ދެކޮޅަށް ދަތިކުރުމުގެ ފިޔަވަޅު އަޅާފައިވާ ކަމަށް އެމެރިކާގެ ޓްރެޜަރީ ޑިޕާޓްމަންޓުން މިދިޔަ ހުކުރު ދުވަހު ވަނީ ދަތިކުރުމުގެ ފިޔަވަޅު އަޅާފައެވެ.
ޗައިނާގެ ފޮރިން މިނިސްޓްރީގެ ތަރުޖަމާނު ވަންގް ވެންބިން ވިދާޅުވީ މި ފިޔަވަޅުތަކަކީ ޗައިނާގެ ދާޚިލީ ކަންކަމަށް ވަރަށް ބޮޑަށް ނުފޫޒު ފޯރުވުމާއި ބައިނަލްއަގްވާމީ ގުޅުންތަކުގެ އަސާސީ މިންގަނޑުތަކާ ހިލާފު ފިޔަވަޅެއް ކަމަށެވެ.
"ދަތިކުރުމުގެ ފިޔަވަޅުތައް މިހާރުން މިހާރަށް އަނބުރާ ގެންދިއުމަށް އެމެރިކާގެ ފަރާތުން އިލްތިމާސް ކުރަން،" ބްރީފިންއެއްގައި އޭނާ ވިދާޅުވިއެވެ.
އޭނާ ވިދާޅުވީ، ކޮންމެ ދަނޑިވަޅެއްގައި ވެސް އެހެން ގައުމުތަކާ ދެކޮޅަށް ދަތިކުރުމުގެ ފިޔަވަޅު އެޅުމުގެ އެއްވެސް ހައްގެއް އެމެރިކާއަށް ނޯންނާނެ ކަމަށާއި އެއީ ދުނިޔޭގެ ފުލުހުންގެ ރޯލު ކުޅުމުގެ ގާބިލުކަމެއް ނެތް ގައުމެއް ކަމަށް ވަންގް ވިދާޅުވިއެވެ.
