މަސްތުވާތަކެއްޗާއެކު ދެ ފިރިހެނަކު ހައްޔަރު ކޮށްފި
ތިން ކިލޯގެ މަސްތުވާތަކެއްޗާއެކު ދެ މީހަކު ހައްޔަރުކޮށްފިއެވެ.
ހައްޔަރުކޮށްފައިވަނީ 22 އަހަރުގެ ދިވެހި ދެ ފިރިހެނުންނެވެ. އެ ދެ މީހުންގެ މައްޗަށް ކުރަނީ މަސްތުވާތަކެތި ގެންގުޅެ އެތަކެތީގެ ވިޔަފާރިކުރާކަމުގެ ތުހުމަތެވެ. އެ ދެ މީހުންގެ ބަންދާމެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރުކުރުމުން އެކެއްގެ ބަންދަށް ޖެހީ 30 ދުވަހެވެ.
ދެންހުރި މީހާގެ ބަންދަށް ޖެހީ ފަސް ދުވަހެވެ. އޭނާ ހޮސްޕިޓަލުގައި އެނދުމަތި ކޮށްފައިވާތީ ބަންދުގެ މުއްދަތު ޖެހީ އޭނާގެ ޣައިރު ހާޒިރުގައެވެ. ކޯޓު އަމުރުގައި ބުނެފައިވަނީ އޭގެތެރެއިން އެކަކު މަސްތުވާތަކެތި ހުރި ޕާރުސަލާ ހަވާލުވުމަށް ކޫރިއަރ ސަރވިސް އޮފީހަށް ގޮސް ޕެކޭޖާ ހަވާލުވެފައިވާ ކަމުގައެވެ.
ދެން ހުރި މީހާ ވެސް މަސްތުވާތަކެތި ހުރި ޕާރުސަލާ ހަވާލުވިކަމަށް ކޯޓު އަމުރުގައި ބުނެފައިވެއެވެ. ކޯޓު އަމުރުގައި ބުނެފައިވާ ގޮތުން އެ މީހުން އަތުން އަތުލައިގަތް މަސްތުވާތަކެތީގެ ބަރުދަނުގައި 3.683 ކިލޯ ގްރާމް ހުއްޓެވެ.
