ޕްރައިމަރީގެ ތާރީޚު ކަނޑައެޅީ ދެ ފަރާތާ މަޝްވަރާ ކުރުމަށްފަހު- ފައްޔާޒު
އެމްޑީޕީގެ ރިޔާސީ ޕްރައިމަރީ ބާއްވާނެ ތާރީޚާ، އިޢުލާނު ކުރާނެ ތާރީޚު ކަނޑައެޅީ، ދެ ކެންޑިޑޭޓުންނާވެސް މަޝްވަރާ ކުރެއްވުމަށް ފަހުގައި ކަމަށް އެ ޕާޓީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒް އިސްމާއިލް ރޭ ވިދާޅުވެއްޖެއެވެ.
އެމްޑީޕީގެ ޕްރައިމަރީ ބާއްވަން ނިންމައިފައިވަނީ އަންނަ މަހުގެ 28 ވަނަ ދުވަހުއެެވެ. ރޭ ތާޖުއްދީން ސްކޫލްގައި ބޭއްވި އެމްޑީޕީގެ ޤައުމީ މަޖިލީހުގެ ބައްދަލުވުމުގައި، ރައީސް މުޙައްމަދު ނަޝީދުގެ ފެކްޝަނުގެ މެމްބަރުން ކުރައްވާ ބައެއް ތުހުމަތުތަކަށް ރައްދު ދެއްވައި، ފައްޔާޒު ވިދާޅުވީ އިންތިޚާބު ބާއްވާނެ ދުވަހާއި އިއުލާން ކުރާނެ ދުވަސް ކަނޑައެޅީ ދެ ކެނޑިޑޭޓުންނާ މަޝްވަރާ ކުރުމަށް ފަހުގައި ކަމަށެވެ.
މިގޮތުން ރައީސް އިބްރާހީމް މުޙައްމަދު ޞާލިޙު ރައީސް ބޭނުންފުޅު ވަނީ މިމަހުގައި، އިންތިޚާބު އިއުލާނު ކުރުމަށް ފަހު އަންނަ މަހު 15ގައި އިންތިޚާބު ބާއްވަން ކަމަށާއި ނަޝީދު ބޭނުންފުޅު ވަނީ ޖެނުއަރީގައި އިއުލާން ކުރުމަށް ފަހު ފެބްރުއަރީ މަސް ތެރޭގައި އިންތިހާބު ބޭއްވުމަށް ކަމަށް ފައްޔާޒް ވިދާޅުވިއެވެ.
މުއްދަތު ނޭނގޭ ކަމަށް ވިދާޅުވެ ނަޝީދު ފެކްޝަނުން ދައްކަވަމުން ގެންދަވާ ވާހަކަތައް ދޮގު ކުރައްވައި ފައްޔާޒު ވިދާޅުވީ، މުއްދަތު ނޭނގި ނޯންނާނެ ކަމަށާއި، ތާރީޚުތައް ކަނޑައެޅީ، އިންސާފުވެރިކަމާއެކުގައި ދެ ފަރާތާވެސް ވާހަކަ ދައްކައިގެން ކަަމަށެވެ.
އޭނާ ވިދާޅުވީ މިހާ އަވަހަށް އިންތިހާބު ގަޑުބަޑު ކޮށްފައިވާ ކަމާއި އިންސާފުވެރި ނުވާނެ ކަމަށް ބައެއް ފަރާތްތަކުން ތުހުމަތު ކުރާތީ ހިތާމަ ކުރައްވާ ކަމަށެވެ. އަދި މުޅި އެމްޑީޕީގެ "ކްރެޑިބިލިޓީ" ގެއްލުވާލަން ކުރާ މަސައްކަތަށް ޖާގައެއް ނުދެއްވާނެ ކަމަށްވެސް ވިދާޅުވިއެވެ.
Ads by STO
