އިންތިޚާބުން ބަލިވުމަކީ ދަންނަ ކަމެއް ނޫން، މިހައިތަނަށް ވެފައި އޮތް ކަމެއްވެސް ނޫން: ރައީސް ނަޝީދު

އިންތިޚާބަކުން ބަލިވުން އެއީ ދަންނަ ކަމެއް ނޫން ކަމަށާއި، އެމަނިކުފާނު މިހައިތަނަށް އިންތިޚާބަކުން ބަލިވެފައި ނުވާ ކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.

Ads by STELCO

މިމަހުގެ 28 ވަނަ ދުވަހު ބާއްވާ އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ރައީސް ނަޝީދު، އެމަނިކުފާނުގެ "ފިކުރެއްގެ ދިރުން" ކެމްޕެއިން ކުރިއަށްދާ ގޮތާ ގުޅޭގޮތުން ނޫސްވެރިންނަށް މަޢުލޫމާތު ދެއްވުމަށް ބޭއްވި ޕްރެސް ކޮންފެރެންސްގައި، ޕްރައިމަރީން އެމަނިކުފާނު ބަލިވެއްޖެ ނަމަ، ވާދަވެރިޔާ، ރައީސް އިބްރާހީމް މުޙައްމަދު ޞާލިޙާއެކުގައި ހުންނަވާނެތޯ ނޫސްވެރިޔަކު ސުވާލު ކުރުމުން ވިދާޅުވީ އިންތިޚާބުން ބަލިވުމަކީ އެއްވެސް ވަރަކަށް ދެކޭ ކަމެއް ނޫން ކަަމަށާއި، އެކަން އެެހެން ވެދާނެ ކަމަށް އަންދާޒާވެސް ނުކުރައްވާ ކަަމަށެވެ.

"އަޅުގަނޑު އެއްގޮތަކަށްވެސް އަންދާޒާ ކޮށްފަ އޮތް ކަމެއް ނޫން، އިންތިޒާރު ކުރާ ކަމެއް ނޫން، ދެކޭ މަންޒަރެއްވެސް ނޫން. ދުވަހަކުވެސް ވެފަ އޮތް ކަމެއްވެސް ނޫން. އަޅުގަނޑަށް، އިންތިޚާބުން ބަލިވުން، އެއީ އަޅުގަނޑު އަސްލު ދަންނަ ކަމެއް ނޫން. ބަލި ވާނަމައެއް، އަޅުގަނޑެއް އެކަމަކާއެއް ނޫޅޭނަން، އެނގިވަޑައިގަންނަވާނެ 2013ގެ އިންތިޚާބުގައިވެސް އަދަދުތައް ހުރި ގޮތް. ގަލޮޅު ހިންގާ ކޮމެޓީގެ ސެކްރެޓަރީން މަޖީދިއްޔާގެ އެކުވެރިންގެ ގުޅުމަށް އަޅުގަނޑު ކުރިމަތިލީއްސުރެ ފަށައިގެން، އަޅުގަނޑު ދަންނަ ކަމެއް، އިންތިޚާބު." ރައީސް ނަޝީދު ވިދާޅުވިއެވެ.

ރައީސް ނަޝީދު އިތުރަށް ވިދާޅުވީ ރައީސް ޞާލިޙަށް އެމްޑީޕީ ފިކުރުގެ 70،000 ވޯޓު ގެއްލިފައިވާ ކަމަށެވެ. ނަޝީދަށް ތާއީދު ކުރާ މެމްބަރުން އެމްޑީޕީގެ ދަފްތަރުން، ވަކި ކޮށްފައިވާ ކަމަށްވެސް ތުހުމަތު ކުރެއްވިއެވެ. އެގޮތުން 39،000 މެމްބަރުން ވަކި ކުރިއިރު، އެ މެމްބަރުންނަށް ތާއީދު ކުރާ މީހުންނާއެކުގައި، ރައީސް ޞާލިޙަށް 70،000 ވޯޓު ގެއްލިފައިވާ ކަމަށް ވިދާޅުވިއެވެ.

ރިޔާސީ ޕްރައިމަރީއާ ދިމާކޮށް އެމްޑީޕީގެ އެތެރޭގެ ކޯޅުން ހޫނުވެފައިވާއިރު، ރައީސް ޞާލިޙާއި ރައީސް ނަޝީދުގެ ފެކްޝަނުން ދަނީ ބަހުގެ ހަމަލާތައްވެސް ބަދަލު ކުރަމުންނެވެ. ރައީސް ނަޝީދު ވިދާޅުވެފައިވަނީ ރައީސް ޞާލިޙު، މިއަހަރުގެ ރިޔާސީ އިންތިޚާބަށް ނުކުންނަވައިފިނަމަ، އެމްޑީޕީއަށް 20 އިންސައްތަ ވޯޓުވެސް ނުލިބޭނެ ކަމަށެވެ.