އެމްޑީޕީ ރިޔާސީ ޕްރައިމަރީގައި ވޯޓުލެވޭ މީހުންގެ ދާއިމީ ލިސްޓު އާންމުކޮށްފި
މި މަހު ބޭއްވުމަށް ހަމަޖެހިފައިވާ މޯލްޑިވިއަން ޑިމޮކްރެޓިކް ޕާޓީގެ ރިޔާސީ ޕްރައިމަރީގައި ވޯޓުލެވޭ ދާއިމީ މެމްބަރުންގެ ލިސްޓު މިއަދު އާންމުކޮށްފިއެވެ.
އެމްޑީޕީން މިއަދު އާންމުކުރި ލިސްޓުގައިވާ ގޮތުން ރިޔާސީ ޕްރައިމަރީގައި އެ ޕާޓީގެ ދަފްތަރުގައި އޮތް 57،255 މީހަކަށް ވޯޓު ލެވޭނެއެވެ. އެހެންނަމަވެސް މިދިޔަ މަހު އާއްމުކުރި ވަގުތީ ލިސްޓުގައިވާ ގޮތުން ވޯޓްލުމުގެ ހައްޤު 57،714 މެމްބަރަކަށް ލިބެއެވެ. ދާއިމީ ލިސްޓް ނެރުނީ ވަގުތީ ލިސްޓުގައި ހިމެނުނު 459 މީހެއްގެ ނަން އުނިކުރުމަށްފަހުއެވެ.
އެމްޑީޕީގެ ރިޔާސީ ޕްރައިމަރީ ބޭއްވުމަށް ހަމަޖެހިފައިވަނީ މިމަހުގެ 28 ވަނަ ދުވަހުއެވެ. ރިޔާސީ ޕްރައިމަރީގައި ވާދަކުރައްވަނީ ރައީސް އިބްރާހިމް މުހައްމަދު ޞާލިހުއާއި ރައީސް ނަޝީދުއެވެ.
އިންތިޚާބުގައި ދެބޭފުޅުންވެސް ގެންދަވަނީ ކެމްޕެއިން ހަރަކާތްތައް މާލެއާއި ރާއްޖޭގެ އެކި ކަންކޮޅުތަކުގައި ކުރިއަށް ގެންދަވަމުންނެވެ.
