އިންޑިއާއިން ރާއްޖޭގައި މިހާރު ވެސް 25 މަޝްރޫއު އެބަ ކުރިއަށް ގެންދޭ: ޝަހީބް
އިންޑިއާއިން ރާއްޖޭގައި މިހާރުވެސް 25 މަޝްރޫއު އެބަ ކުރިއަށް ގެންދާކަމަށާއި ބައެއް މަޝްރޫޢުތަކުގެ މަސައްކަތްތައް މިހާރު ނިމިފައިވާއިރު ބައެއް މަޝްރޫޢުތަކުގެ މަސައްކަތް ނިމުމާއި ގާތްވެފައިވާކަމަށް ރާއްޖެއިން އިންޑިއާއަށް ކަނޑައަޅާފައި ހުންނަވާ ސަފީރު އިބްރާހީމް ޝަހީބު ވިދާޅުވެއްޖެއެވެ.
އިންޑިއާގެ ވިއޯން ނިއުސްއަށް ދެއްވި އިންޓަރވިއުއެއްގައި ޝަހީބް ވިދާޅުވީ މިމަޝްރޫއު ތަކަކީ އިންޑިއާ ސަރުކާރުން ރާއްޖޭގައި ހިންގާ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓުގެ ދަށުން ކުރިއަށް ގެންދާ މަޝްރޫއުތަކެއްކަމަށެވެ.
ރާއްޖޭގައި މިހާރު ކުރިއަށްދާ އުމްރާނީ ތަރައްޤީގެ އެންމެ ބިޔަ މަޝްރޫޢުއަކީ ގްރޭޓަރ މާލެ ކަނެކްޓިވިޓީ ޕްރޮޖެކްޓުކަމަށާއި މި ޕްރޮޖެކްޓްގެ ދަށުން މާލެ ސިޓީ، ވިލިގިލި، ގުޅީފަޅު އަދި ތިލަފުށި ގުޅާލެވޭނެކަމަށް ޝަހީބް ފާހަގަކުރެއްވިއެވެ.
ސަފީރު ވިދާޅުވީ އިންޑިއާ ސަރުކާރުން ރާއްޖޭގައި ހިންގާ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓުން ރައްޔިތުންނަށް އޭގެ ސީދާ އަސަރުކުރާނެކަމަށެވެ.
ތިލަމާލެ ބުރިޖަކީ އުމްރާނީ ތަރައްގީގެ ބިޔަ މަޝްރޫއުގެ މަސައްކަތުގެ މިހާރުގެ ސްޕީޑަށް ބަލާއިރު، ކޮންޓްރެކްޓް ކުރެވިފައިވާ ގޮތަށް މިއަހަރުގެ ޑިސެމްބަރު މަހު ބްރިޖުގެ މަސައްކަތް މާލެއިން ގުޅިފަޅަށް ނިންމާލެވޭނެ ކަމަށް ޕްލޭނިން މިނިސްޓްރީން ވަނީ މީގެ ކުރިން ބުނެފައެވެ. އެހާތަނަށް ބްރިޖު ހުރަސްކޮށް މާލެއިން ވިލިމާލެއަށް ދަތުރުކުރެވޭ ވަރުވާނެ ކަމަށާއި އަދި 2024 ގައި މުޅި ބްރިޖުގެ މަސައްކަތް އެއްކޮށް ނިންމާލެވޭނެ ކަމަށްވެސް ޕްލޭނިން މިނިސްޓްރީން ވަނީ ބުނެފައެވެ.
