ޕްރައިމަރީ ކޮންޓެކްޓަކަށްވެ، ގަވަރުނަރު އައިސޮލޭޝަނަށް
މޯލްޑިވްސް މޮނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަލީ ހާޝިމް، ކޯވިޑް-19ގެ ޕްރައިމަރީ ކޮންޓެކްޓަކަށްވެ އައިސޮލޭޝަނުގައި ހުންނަން ޖެހިފައިވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަމުގައި ދައުލަތުގެ ދަރަނީގެ މިންވަރު ސާފުނުވާތީ އެކަން ސާފުކުރުމަށް މިހާރު ކުރިއަށްގެންދާ މުޅި މަޖިލީހުގެ ކޮމިޓީ ފެއްޓެވުމުގެ ކުރިންނެވެ.
ފިނޭންސް މިނިސްޓަރު އިބްރާހިމް އަމީރާއި ކުރީގެ ނައިބު ރައީސް އަދި މިނިސްޓަރު އަބްދުﷲ ޖިހާދާއި ކުރީގެ މިނިސްޓަރު އަހުމަދު މުނައްވަރާއި އޮޑިޓަ ޖެނެރަލް ހަސަން ޒިޔަތު ބައިވެރިވާ ކޮމިޓީގައި އެމްއެމްއޭގެ ގަވަރުނަރު އަލީ ހާޝިމް ބައިވެރިވެވަޑައިގެންނެވީ އޮންލައިންކޮށެވެ.
ނަޝީދު ވިދާޅުވީ މި ބައްދަލުވުމުގައި ގަވަރުނަރު އޮންލައިންކޮށް ބައިވެރިވެވަޑައިގަތީ ކޮވިޑް ޖެހުނު މީހެއްގެ ޕްރައިމަރީ ކޮންޓެކްޓަކަށް ވާތީ އެމަނިކުފާނު އައިސޮލޭޝަންގައި ހުންނެވުމާ ގުޅިގެން ކަމަށެވެ.
