އާސަހަރާގައި ހުރި މަހާނަ ގާތައް ނަގަން އަންގައިފި
މައްޗަންްގޯޅީ އާސަހަރާގައި ހުރި މަހާނަ ގާތައް ނެގުމަށް މާލެ ސިޓީ ކައުންސިލުން އަންގައިފިއެވެ.
މާލެ ސިޓީ ކައުންސިލުން އަންގާފައިވާ ގޮތުގައި އާސަހަރާގައި ހުރި މަހާނަ ތަކުގައި ޖަހާފައިހުރި މަހާނަ ގާތައް މިހިނގާ އޯގަސްޓުމަހުގެ 15 ގެ ކުރިން އެތަނުން ނަގައި، ގެންދަން ޖެހެއެވެ.
އެމުއްދަތުގެ ތެރޭގައި އެތަނުން ނުނަގާ މަހާނަ ގާތައް އެކައުންސިލުގެ ފަރާތުން ނެގުމަށްފަހު އެތަކެތި ނައްތާލެވޭނެ ކަމަށް ވެސް މާލެ ސިޓީ ކައުންސިލުން އަންގާފައިވެއެވެ.
މީގެއިތުރުން މާލެ ސިޓީ ކައުންސިލުން ބުނެފައިވަނީ އާސަހަރާގައި ހުރި މަހާނަ ގާތައް ނަގަންވާނީ އެކަމާއިބެހޭ އިދާރާގެ ސުޕަވައިޒަރާއި ގުޅުމަށްފަހު، ސުޕަވައިޒަރު އަންގާ ގޮތުގެ މަތިން ކަމަށެވެ.
އެނގިފައިވާ ގޮތުގައި ސިޓީ ކައުންސިލުން މައްޗަންގޮޅީ އާސަހަރާގެ މަހާނަތަކުގައި ޖަހާފައިހުރި މަހާނަ ގާތައް ނެގުމަށް އަންގާފައި މިވަނީ މައްޗަންގޮޅީ އާސަހަރާގެ ހުޅަނގު ދެކުނު ބަޔާއި ދެކުނު ފަރާތު މެދު ބަޔަށް ވެލި އެޅުމުގެ މަސައްކަތް، މިއަހަރުގެ ސެޕްޓެމްބަރު މަހު 15 ވަނަ ދުވަހުގައި ފެށުމަށް ހަމަޖެހިފައިވާތީއެވެ.
މާލެ ސިޓީ ކައުންސިލުން އަންގާފައިވާ ގޮތުގައި މަހާނަގާތައް ނެގުމުގެ ކުރިން ގުޅަންޖެހޭ ކަމާއި ބެހޭ އިދާރާގެ ސުޕަވައިޒަރުގެ ނަންބަރަކީ 7994565 އެވެ.
