ކެމްޕެއިނުގެ ތެރެއިން ފައްޔާޒާ ދިމާ ނުކުރުމަށް، ރައީސް ނަޝީދު އެދިވަޑައިގެންފި
އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒު އިސްމާޢީލްއާ އެއްވެސް ބޭފުޅަކު ދިމާނުކުރުމަށް އެމްޑީޕީގެ ރައީސް މުހައްމަދު ނަޝީދު އެދިވަޑައިގަތުމުން، ފައްޔާޒު އެކަމަށްޓަކައި ޝުކުރު އަދާކުރައްވައިފިއެވެ.
މިމަހުގެ 28 ވަނަ ދުވަހު ބާއްވާ އެމްޑީޕީގެ ރިޔާސީ ޕްރައިމަރީގެ ކެމްޕެއިންގެ ތެރެއިން، ފައްޔާޒާ ދިމާ ނުކުރުމަށް ރައީސް ނަޝީދު އެދިވަޑައިގަތީ އެމްޑީޕީގެ ސޯޝަލް މީޑިއާ ވަޓްސްއެޕް ގުރޫޕްގައި ހިއްސާކުރެއްވި މެސެޖެއްގައެވެ.
ރައީސް ނަޝީދުގެ މެސެޖުގައި ވިދާޅުވީ އެމްޑީޕީގެ ރިޔާސީ ޕްރައިމަރީ ކާމިޔާބު ކުރައްވާނެ ކަމަށެވެ. އޭގެފަހުގައި އެމަނިކުފާނު އެދިވަޑައިގަތީ އެއްވެސް ބޭފުޅަކު މިނިސްޓަރު ފައްޔާޒުއާ އަދި ފައްޔާޒުގެ އާއިލާ އާއި ޒާތީކޮށް ދިމާނުކުރުމަށެވެ.
ރައީސް ނަޝީދުގެ މި މެސެޖުގެ ސްކްރީންޝޮޓެއް މިނިސްޓަރު ފައްޔާޒު ވަނީ ޓްވިޓާގައި ހިއްސާކުރައްވައިފައެވެ. އަދި ވިދާޅުވީ މީޑިއާގައިވެސް އަދި އެހެން ގޮތަކުންވެސް އޭނާއާ ދިމާކުރެވިދާނެ ކަމަށެވެ.
ނަމަވެސް ސިޔާސީ ޚިޔާލުތަފާތުވުމުން މަގުމަތިން އަނބިދަރިންނާ ދިމާކުރުމަކީ ބަލައިގަނެވޭނެ ކަމެއް ނޫން ކަމަށް ވިދާޅުވިއެވެ. އަދި އެކަން އެހެން ނުކުރުމަށް ކެމްޕޭން ޓީމަށް އިލްތިމާސް ކުރެއްވީތީ ރައީސް ނަޝީދަށް ޝުކުރު ދަންނަވާ ކަމުގައިވެސް ވިދާޅުވިއެވެ.
ރައީސް ނަޝީދަށާއި ރައީސް އިބްރާހީމް މުޙައްމަދު ޞާލިޙަށް ތާއީދުކުރާ ދެ ފެކްޝަން އެމްޑީޕީ ތެރޭގައި އުފެދިފައިވާއިރު، މިނިސްޓަރު ފައްޔާޒު ހުންނެވީ ރައީސް ޞާލިޙާއެކުގައެވެ.
Ads by STO
