ސަރުކާރަކީ އެމްޑީޕީ ސަރުކާރެއް ނޫން، ބޮޑު ބައި އޮތީ ކޯލިޝަނަށް: ރައީސް ނަޝީދު
(ތ. ކިބިދޫން) ރައީސް އިބްރާހީމް މުޙައްމަދު ޞާލިޙްގެ ސަރުކާރަކީ އެމްޑީޕީގެ ސަރުކާރެއް ނޫން ކަމަށާއި، މިއަދުގެ ސަރުކާރުގެ ބޮޑު ބައި އޮތީ ކޯލިޝަނުގައި ހިމެނޭ އެހެން ޕާޓީތަކުގައި ކަމަށް، ރައީސް މުޙައްމަދު ނަޝީދު މިއަދު ވިދާޅުވެއްޖެވެ.
އެމްޑީޕީ ޕްރައިމަރީއަށް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ތ. ކިނބިދުއަށް ވަޑައިގެން ދެއްކެވި ވާހަކަފުޅުގައި ރައީސް ނަޝީދު ވިދާޅުވީ، އެމްޑީޕީއަށް މި ސަރުކާރުން ލިބިފައިވަނީ 40 ޕަސަންޓު ކަމަށާއި، ބާކީ 60 ޕަސަންޓަކީ ކޯލިޝަނުގައި ހިމެނޭ އެހެން ޕާޓީތައް ކަމަށެވެ.
"އަޅުގަނޑުމެންގެ ސަރުުކާރެއް ނޫން މިއީ، އަޅުގަނޑުމެންގެ ސަރުކާރެއްނަމަ ތި ބޭފުޅުންގެ އާއްމުދަނީ އިތުރުވާނެ" މި ސަރުކާރުގެ ސިޔާސަތުތަކަށް ކެންޕެއިންގައި ވަރަށް ބޮޑަށް ފާޑު ވިދާޅުވަމުން އަންނަ ރައީސް ނަޝީދު ވިދާޅުވިއެވެ.
މި ސަރުކާރުގެ ކޯލިޝަނުގައި ހިމެނެނީ ޖުމްހުރީ ޕާޓީ، އަދާލަތު ޕާޓީ އަދި އެމްއާރުމްއެވެ. މިނިސްޓްރީތަކާއި ސަރުކާރުގެ ކުންފުނިތަކުގައި ޕާޓީ ކޯލިޝަންގެ ސްލޮޓްތަކުގެ މެންބަރުން ތިއްބަވައެވެ.
ރައީސް ނަޝީދު ވިދާޅުވީ، މިއަދު އެމްޑީޕީ ސަރުކާރެއްނަމަ ޒުވާނުން ފެނަކައަށް ވައްދާ ވިނަކަހަން ނޫޅޭނެ ކަމަށާއި، އުފެއްދުންތެރިކަން އިތުރު ކުރަން މަސައްކަތް ކުރާނެ ކަމަށެވެ. އަދި އާއްމުދަނީ ދަށްނުވާނެ ކަމަށާއި މަސްކިލޯއަށް ހަމަ އަގު ލިބޭނެ ކަމަށެވެ. ރައީސް ނަޝީދު ވިދާޅުވީ، މިކަންކަން ނުވެ އޮތީ އެމްޑީޕީގެ ސިޔާސަތު ތަންފީޒް ނުވެ އޮތުމުން ކަމަށެވެ.
އެމްޑީޕީގެ ރިޔާސީ ޕްރައިމަރީގައި ނަޝީދުއާ ވާދަކުރައްވާ ރައީސް ޞާލިޙް ދެކެވަޑައިގަންނަވާ ގޮތުގައި އެމަނިކުފާނުގެ ގަދަ ފަޔަކީ ކޯލިޝަނެވެ. އަދި ކޯލިޝަން ހެއްދެވޭނީ އެމަނިކުފާނަށް ކަމަށާއި ކޯލިޝަނަކާ ނުލާ ސަރުކާރެއް ނެހެދޭނެ ކަމަށް ރައީސް ޞާލިޙް ދަނީ ތަކުރާރުކޮށް ވިދާޅުވަމުންނެވެ.
އެހެންނަމަވެސް ނަޝީދު ވިދާޅުވަނީ އެމަނިކުފާނު ކޯލިޝަނުގެ ވިސްނުން ގެންނަވާނީ ރިޔާސީ އިންތިހާބު ދެވަނަ ބުރަކަށް ދާ ހާލަތެއްގައި ކަމަށެވެ. އަދި ފުރަތަމަ ބުރުގައި ސިޔާސީ ގިނަ ޕާޓީތަކުން ވާދަ ކުރައްވާނެ ކަމަށް ރައީސް ނަޝީދު ޤަބޫލުފުޅު ކުރައްވައެވެ.
