އަމީރު މަސްއޫލިއްޔަތު އަދާކުރައްވަނީ ޒިންމާދާރު ކަމާއެކު: ރޮޒައިނާ
ފިނޭންސް މިނިސްޓަރު އިބްރާހިމް އަމީރު މަގާމުގެ މަސްއޫލިއްޔަތު އަދާކުރައްވަމުން ގެންދަވަނީ ޒިންމާދާރުކަމާއެކު ކަމަށް އައްޑޫ ސިޓީ މީދޫ ދާއިރާގެ މެމްބަރު ރޮޒައިނާ އާދަމްް ވިދާޅުވެއްޖެއެވެ.
ރޮޒައިނާ، މިހެން ވިދާޅުވީ މިއަދުގެ މަޖިލީހުގެ ޖަލްސާގައި ރައީސް މުހައްމަދު ނަޝީދު، ފިނޭންސް މިނިސްޓަރު އިބްރާހިމް އަމީރު ގާނޫނުގައިވާ ގޮތަށް ދަރަނީގެ ހިސާބުތައް ނުބަހައްޓަވާ ކަމަށް ވިދާޅުވުމާއި ގުޅިގެންނެވެ.
މިކަމާ ގުޅިގެން ރޮޒައިނާ ކުރެއްވި ޓްވީޓެއްގައި ވިދާޅުވީ ފިނޭންސް މިނިސްޓަރުގެ މަސްއޫލިއްޔަތު ޒިންމާދާރުކަމާއެކު އަދާ ކުރައްވަމުން ގެންދަވާ ކަމަށްޓަކައި މިނިސްޓަރު އަމީރަށް މަރުހަބާ ދަންނަވާ ކަމަށެވެ.
"ސާބިތުކަމާ އަމާނާތްތެރިކަމާއިއެކު ރައްޔިތުންނަށްޓަކައި ތިޔަގޮތުގައި ޒިންމާ އަދާކުރައްވަމުން ގެންދަވާ،" ރޮޒައިނާ ވިދާޅުވިއެވެ.
މަޖިލީހުގެ ކޮމިޓީގެ ރިޔާސަތުގައި އިންނަވައި ނަޝީދު ވިދާޅުވީ، ދައުލަތް ދަރައިފާނެ ކަމުގެ އިހުސާސް ކުރެއްވުނު ކަމަށާއި ދައުލަތް ދަރައިފިނަމަ އެއީ ވަރަށް ބޮޑު ދެރަކަމެއް ކަމަށެވެ.
އޭގެ ޖަވާބުގައި މިނިސްޓަރ ވިދާޅުވީ އެ ހާލަތަށް ކަންކަން ދިޔަ ނުދެއްވާނެ ކަމަށެވެ. ވަކި ކުންފުންޏެއްގެ ނަން ވިދާޅުނުވެ ނަޝީދު ވިދާޅުވީ، އަމިއްލަ ކުންފުންޏަކަށް ދައުލަތުން ދީފައިވާ ގެރެންޓީއެއް ނުދެއްކުމުގެ ސަބަބުން ދިމާވި ކަންކަމާ ހެދި ދައުލަތް ދަރައިފާނެ ކަމުގެ ބިރު އެ މަނިކުފާނަށް ހީފުޅުވި ކަމަށެވެ.
Ads by STO
