އިންޑިއާއިން ރާއްޖެއަށް 2.7 ބިލިއަން ޑޮލަރުގެ އެހީ ދީފި
ފާއިތުވި އަހަރުތަކުގެ ތެރޭ އިންޑިއާ ސަރުކާރުން، ދިވެހި ސަރުކާރަށް 2.7 ބިލިއަން ޑޮލަރުގެ އެހީތެރިކަން ފޯރުކޮށްދެއްވައިފައިވާ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
ފޮރިން މިނިސްޓަރު މިކަން ހާމަކުރައްވައިފައިވަނީ، ހަނިމާދޫ އެއާޕޯޓު ތަރައްޤީ ކުރުމުގެ މަޝްރޫޢުގެ ޢަމަލީ މަސައްކަތް ފެށުމަށް ބޭއްވި ރަސްމިއްޔާތުގައި ދެއްކެވި ވާހަކައިގައެވެ.
ޝާހިދު ވިދާޅުވި ގޮތުގައި ރާއްޖޭގެ އުމްރާނީ ތަރައްޤީ ކުރުމަށް ފާއިތުވެދިޔަ އަހަރުތަކުގައި އަދި މިއަދާ ހަމައަށްވެސް، އިންޑިއާ ސަރުކާރުން ދަނީ ކެނޑިނޭޅި ނުހަނު ގިނަ އެހީތަކެއް ވެދެމުން ކަމަށާއި، އެ ޤައުމުން މިހައިތަނަށް ރާއްޖެއަށް، ތަރައްޤީގެ އެކި މަޝްރޫޢުތައް ހިންގުމަށް ވެދެއްވި އެހީތަކުގެ ތެރެއިން، 173.4 މިލިއަން ޑޮލަރަކީ ހިލޭ އެހީ ކަމަށްވެސް ވިދާޅުވިއެވެ.
އަދި މި އެހީތެރިކަމުގެ ސަބަބުން، ރާއްޖޭގައި ބޮޑެތި މަޝްރޫޢުތަކެއް ހިންގުމަށް މަގުފަހިވެފައިވާ ކަމަށްވެސް މިނިސްޓަރު ވިދާޅުވިއެވެ.
ފޮރިން މިނިސްޓަރ ވިދާޅުވީ ރާއްޖޭގެ އުތުރާއި ދެކުނާއި އަދި މެދު ރާއްޖޭގެ އަތޮޅުތަކުގައި ރަށްވެހީންގެ ދިރިއުޅުމުގެ ހާލަތު ކުރިއެރުވުމަށް އެކި ދާއިރާތަކުން އިންޑިއާގެ އެހީގައި ހިންގަމުންދާ ކަމަށެވެ. އަދި ބައެއް މަޝްރޫޢުތަށް ނިމި އޭގެ ލާބައާއި މަންފާ ދިވެހި ރައްޔިތުންނަށް މިހާރުވެސް ލިބެމުންދާ ކަމަށް އެމަނިކުފާނު ވިދާޅުވިއެވެ
ރައީސް އިބްރާހީމް މުޙައްމަދު ޞާލިޙުގެ ވެރިކަމުގައި އިންޑިއާ-ރާއްޖެ ގުޅުން ވަރަށް ބޮޑަށް ބަދަހި ވެފައިވާއިރު، މި ގުޅުމުގެ ސަބަބުން ރާއްޖޭގެ މިނިވަންކަމަށް ބުރޫ އަރާ ކަަމަށް ބުނެ، އިދިކޮޅު ފަރާތްތަކުން މީގެ ކުރިން ވަނީ "އިންޑިއާ އައުޓް"ގެ ނަމުގައި ކެމްޕެއިނެއްވެސް ހިންގައިފައެވެ.
