އެމްޑީޕީ ޕްރައިމަރީ: ލިސްޓުގައި ނަން ނެތް މީހެއްގެ ނަމުގައި ބައްޕަ ވޯޓުލީ މައްސަލައެއް
އެމްޑީޕީގެ ރިޔާސީ ޕްރައިމަރީގައި ގއ. ވިލިނގިލީ ވޯޓު ފޮއްޓަށް ވޯޓު ލާ ލިސްޓުގައި ނަން ނެތް މީހެއްގެ ނަން މަތީގައި އޭނާގެ ބައްޕަ ވޯޓު ލީ މައްސަލައެއް ހޫނުވެއްޖެއެވެ.
ވިލިނގިލީ ވޯޓު ފޮށި ބެހެއްޓިފައި ހުރި ތާޖުއްދީން ސްކޫލުގައި ވަނީ މިކަމާއި ގުޅިގެން ހަމަނުޖެހުން ހިނގައިފައެވެ. އެ ވޯޓު ފޮއްޓަށް ވޯޓު ލުން ވަގުތީ ގޮތުން ބަންދުކޮށްފައިވާއިރު އެކަމާއި ގުޅޭ ތަފްސީލުތައް ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ވަނީ ސޯޝަލް މީޑިއާގައި ހާމަ ކުރައްވައިފައެވެ.
އީވާ ވަނީ ވޯޓު ލީ މީހާގެ ވަނަވަނު ހާމަކޮށްފައެވެ.
ފޮޓޯ ހާމަކޮށް އޭނާ ވިދާޅުވީ ގއ. ވިލިނގިލީ ޝީޝާ ނިއުޝަމް ޝިހާބްގެ ނަމުގައި އޭނާގެ ބައްޕަ ވޯޓު ލާފައިވާ ކަމަށެވެ. އަދި ނިއުޝަމްގެ ނަން ވިލިނގިލީ ވޯޓު ލެވޭ މީހުންގެ ލިސްޓުގައި ނެތްކަމުގެ ޔަގީންކަން ލިބޭކަމަށްވެސް އީވާ ވިދާޅުވި އެވެ.
އީވާ ވަނީ ޖަރީމާތައް ހުއްޓުވަން އެމްޑީޕީ ސެކްރެޓޭރިއެޓަށް ގޮވާލައިފައެވެ.
ވޯޓު ފޮށި ގަޑުބަޑު ކޮށްގެން ވޯޓުލުން ހުއްޓުވި މިއީ ތިންވަނަ ފޮއްޓެވެ. މީގެ ކުރިން ހުއްޓުވީ ގދ. ހޯޑެއްދޫ ވޯޓު ފޮއްޓާއި ރ. އަތޮޅު ރަށެއްގެ ވޯޓު ފޮއްޓެކެވެ.
މާލޭގައި ވޯޓުލުން ކުރިއަށްދާ ބައެއް މަރުކަޒުތަކުގައި މައްސަލަ ހޫނުވެ ފުލުހުންވެސް ދަނީ ހަރަކާތްތެރިވަމުންނެވެ. ރައީސް މުހައްމަދު ނަޝީދުގެ ފެކްޝަނުން ވަނީ ވޯޓު އޮޅުވައިލަން މަސައްކަތް ކުރާކަމުގެ ގިނަ ޝަކުވާތަކެއް އުފުލައިފައެވެ.
އެހެންނަމަވެސް ރައީސް އިބްރާހިމް މުހައްމަދު ޞާލިހު ވަނީ ވޯޓު އޮޅުވައިނުލާނެކަމުގެ ޔަގީންކަން އޮތްކަމަށް ވިދާޅުވެފައެވެ.
