ހުރިހާ ބޭފުޅުންވެސް ކެތްތެރިކަމާއި ސުލްހަވެރިކަމާއެކު ވޯޓްލައި ނިންމާލަދެއްވާ: ރައީސްގެ ކެމްޕޭންޓީމް
މިއަދު ކުރިއަށްދާ އެމްޑީޕީގެ ރިޔާސީ ޕްރައިމަރީގެ އިންތިހާބުގައި ހުރިހާ ބޭފުޅުންވެސް ކެތްތެރިކަމާއެކު ސުލްހަވެރިކަމާއެކީ ވޯޓްލާ ނިންމާލަ ދެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ކެމްޕޭން ޓީމުން އެދެފިއެވެ.
އެމްޑީޕީ ރިޔާސީ ޕްރައިމަރީގައި ގިނަ މައްސަލަތަކެއް ޖެހި ހަމަނުޖެހުންތައް ހިނގަމުން އަންނަ އިރު ރައީސް ޞާލިހުގެ ކެމްޕޭން ޓީމުން ވަނީ ވޯޓްފޮށިތައް ގަޑުބަޑުކޮށް މަސްލަހަތު ނަގާލުމަށް ހިނގާއެއްވެސް ކަމެއްގައި އެއްވެސް ފަރާތަކުން ބައިވެރިނުވުމަށް އެދިފައެވެ.
"ހުރިހާ ބޭފުޅުންވެސް ކެތްތެރިކަމާއެކީ ވޯޓްލާ ނިންމާލަދެއްވާ. އިރާދަކުރެއްވިއްޔާ ސާފު ވޯޓަކުން މޮޅުވާނެ. ވާދަވެރިން ވޯޓްފޮށިތައް ގަޑުބަޑުކޮށް މަސްލަހަތު ނަގާލަން އެހިންގާ އެއްވެސް ކަމެއްގައި ބައިވެރި ނުވުމަށް މި ކެމްޕޭންގެ ފަރާތުން އެދެން" އެމްޑީޕީ ކުރިއަށް ކެމްޕޭނުން ބުނެފައިވެއެވެ.
މިހާރު ކުރިއަށްދާ އެމްޑީޕީ ރިޔާސީ ޕްރައިމަރީ އިންތިހާބުގައި ރާއްޖޭގެ ހުރިހާ ރަށެއްގައި ވޯޓްލުން ކުރިއަށްދާއިރު ގިނަ މައްސަލަތަކެއް ވަނީ ފެންމަތިވެފަ އެވެ. މިގޮތުން ވޯޓް ލިސްޓުގައި ނަންނެތި ބައެއް ފަރާތްތަކުން ވޯޓްލާ މައްސަލައިގައި ބައެއް ވޯޓްފޮށިތަކުގެ ވޯޓްލުން ވަނީ ހުއްޓުވާފައިކަން ފާހަގަކޮށްލެވެއެވެ.
