ފޮރެންސިކްގެ ބެލުމުގެ ދަށަށް ގެނެވޭ ހެކީގެ މަޢުލޫމާތު ލީކުނުވާނެ ކަމުގެ ޔަގީކަން ފުލުހުންދީފި
ފުލުހުން ތަހުގީގް ކުރަމުންދާ އެއްވެސް މައްސަލައެއްގައި އެއިދާރާގެ ބެލުމުގެ ދަށަށް ގެންދާ ފޮރެންސިކް ހެކީގެ މައުލޫމާތު ލީކު ނުވާނެކަމުގެ ޔަގީންކަން ފުލުހުން ދެއްވައިފިއެވެ.
ފުލުހުން މިއަދު ވިދާޅުވީ އެ އިދާރާގެ ބެލުމުގެ ދަށަށް ހެކީގެ ގޮތުގައި ގެނެވޭ ތަކެތި ގެންގުޅުމާއި ބެލެހެއްޓުމުގައި ޢަމަލުކުރަނީ ގާނޫނުގައިވާ ގޮތުގެ މަތިން އަދި ބައިނަލްއަގުވާމީ ބެސްޓް ޕްރެކްޓިސްއާ އެއްގޮތަށް ކަމަށެވެ.
އަދި ފޮރެންސިކްގެ ބެލުމުގެ ދަށަށް ގެނެވޭ ހެއްކެއްގައި ހުންނަ އެއްވެސް މައުލޫމާތެއް ލީކު ނުވާނެ ކަމުގެ ފުރިހަމަ ޔަގީންކަން އެ ޚިދުމަތަށް އެބައޮތް ކަމަށާއި ފޮރެންސިކް ލެބޯރަޓަރީގެ މަސައްކަތްތައް ތަރުތީބުކުރެވިފައި ހުންނާނީ ޕްރައިވެސީ ރައްކާތެރިކޮށްދެވޭ ގޮތަށް ކަމަށް ފުލުހުން ވިދާޅުވިއެވެ.
ފުލުހުން މިފަދައިން ވިދާޅުވީ ފިލްމީ ތަރި އައިމިނަތު ރިޝްފާގެ ޒާތީ ފޮޓީތަކެއް ފުލުހުން ލީކުކޮށްފައިވާ ކަމަށް ތުހުމަތުކުރުމާއި ގުޅިގެންނެވެ.
ފޭސްބުކްގައި ރިޝްފާ އިއްޔެ ކޮށްފައިވާ ޕޯސްޓެއްގައި ބުނެފައިވަނީ 2022 ވަނަ އަހަރުގެ ނިވެމްބަރު މަހުން ފެށިގެން ޑިސެމްބަރު މަހުގެ ނިޔަލަށް އޭނާގެ ފޯނާއި ޕާސްވޯޑު ކޯޓު އަމުރެއްގެ ދަށުން ފުލުހުންނާ ހަވާލުކޮށްފައިވާ ކަމަށެވެ. އަދި ފޮރެންސިކްސް ޑިޕާޓްމަންޓާއި، ތިން އޮފިސަރަކަށް އެކްސެސް ދީފައިވާ ކަމަށް ރިޝްފާ ބުންޏެވެ.
ރިޝްފާ ބުނީ މިހާރު އޭނާގެ ހުރިހާ ފޮޓޯއަކާއި ވީޑިއޯތަކެއް ޕަބްލިކް ސައިޓްތަކުގައި ދައުރުވަމުންދާ ކަމަށާއި ފޯނުގެ ޕާސްވޯޑް ދިނީ މައްސަލައެއްގައި ފުރިހަމައެއްބާރުލުން ދޭން ބޭނުންވާތީ ކަމަށެވެ.
