ރިޔާސީ އިންތިޚާބަށް 8000 އޮފިޝަލުން ހޯދަނީ، ވޯޓްލާ މަރުކަޒުގެ ވެރިޔަކަށް 1،500 ރުފިޔާ
ރިޔާސީ އިންތިހާބުގައި ވޯޓުލާ މަރުކަޒުތަކުގައި ހަރަކާތްތެރިވާނެ އޮފިޝަލުން ހޯދުމަށް އިލެކްޝަންސް ކޮމިޝަނުން އިއުލާނުކޮށްފިއެވެ.
އެ ކޮމިޝަނުން ވަނީ ވޯޓު އޮފިޝަލަކަށްވުމުގެ ފުރުސަތު މިހާރު ޖޫން މަހުގެ 22 އާ ހަމައަށް ހުޅުވާލައިފައެވެ.
އީސީން ހާމަކޮށްފައިވާ ގޮތުގައި އޮފިޝަލުންގެ ގޮތުގައި 8،000 އެއްހާ މީހުން ނަގާނެ އެވެ. ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް ރާއްޖޭގެ އެކި ސަރަހައްދުތަކާއި ދިވެހިން ދިރިއުޅޭ ބޭރު ގައުމުތައް ހިމެނޭ ގޮތުން ޖުމްލަ 800 ވޯޓުފޮށި ބަހައްޓާނެ އެވެ.
އޮފިޝަލުންގެ ޝަރުތުތަކުގެ ތެރޭގައި ހިމެނެނީ، އުމުރުން 18 އަހަރު ފުރިފައިވާ މީހެއްކަމުގައިވުމާއި އެއްވެސް ސިޔާސީ ޕާޓީއެއްގެ އިސް މަގާމެއް އަދާކުރަމުންދާ މީހެއް ކަމުގައި ނުވުމެވެ. އަދި އެއްވެސް ކެންޑިޑޭޓެއްގެ ކެމްޕޭން ކަމެއްގައި އުޅޭ މީހަކަށް ވޯޓުލާ މަރުކަޒުގެ އޮފިޝަލަކަށް ނުވެވޭނެއެވެ.
އޭގެ އިތުރުން އޮފިޝަލަށްވުމަށް އެދި ފޯމު ހުށަހެޅި ދާއިރާ / ރަށަށް ކުރިމަތިލާ ކެންޑިޑޭޓެއްގެ މަންމައެއް، ބައްޕައެއް، ދަރިއެއް، އަންބެއް، ފިރިއެއް، އެއްބަނޑުއެއްބަފާ، އެއްބަނޑު ނުވަތަ އެއްބަފާ މީހަކަށް ނުވުން ހިމެނެއެވެ.
