ސައީދުގެ ސުވާލެއް: އެތެރޭގެ ދަރަނި 73 ބިލިއަނަށް، ދެވަނަ ދައުރެއް ދޭންވީތޯ؟
ސަރުކާރުގެ ކުންފުނިތަކާއެކު އެތެރޭގެ ދަރަނިތައް 73 ބިލިއަނަށް އަރާފައިވާކަމަށާއި އަދިވެސް ދެވަނަ ދައުރެއް ދޭންވީތޯ އައްސަވައި ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.
ސައީދު ވިދާޅުވީ އެސްޓީއޯއިން ކްރެޑިޓް ހުއްޓާލަން މަޖުބޫރުވެފައިވާކަމަށާއި އެކަން އެހެން ކުރަން ޖެހުމުން މާލީ ވަޒީރު އެކުންފުންޏަށް ބިރު ދައްކާފައިވާކަމަށެވެ. އަދި އެހެންހަދައިފިނަމަ ވަކި ކުރާނެކަމަށް ވިދާޅުވެފައިވާކަމަށް ސައީދު ވަނީ ތުހުމަތު ކުރައްވާފައެވެ.
"2 ބިލިއަނަށް ވުރެ ގިނަ ރުފިޔާއަށް ފެނަކަވަނީ އެސްޓީއޯއަށް ދަރާފަ އެސްޓީއޯއަށް މަޖުބޫރުވީ ކްރެޑިޓް ހުއްޓާލަން މާލީވަޒީރު އެސްޓީއޯއަށް ދެއްކީ ބިރު. އެހެން ހަދައިފިނަމަ ވަކި ކުރާނެކަމަށް ބުނި ސަރުކާރު ކުންފުނިތަކާއި އެކު އެތެރޭގެ ދަރަނި 73ބިލިއަނަށް! ދެވަނަ ދައުރު؟" ސައީދު ވިދާޅުވިއެވެ.
ފެނަކަ ކުންފުނިން އެސްޓީއޯއަށް ދައްކަންޖޭ 1.8 ބިލިއަން ރުފިޔާ ނުދައްކާ މައްސަލަ ދާދި ފަހުން ވަނީ ފެންމަތިވެފައެވެ. މިގޮތުން 2021 ވަނަ އަހަރުގެ ޖެނުއަރީ މަހުން ފެށިގެން އެސްޓީއޯ އިން ފެނަކަ ކުންފުންޏަށް ވިއްކާފައިވާ ތެލަށް އެއްވެސް ފައިސާއެއް ނުދައްކާކަމަށާއި މިހާތަނަށް ނުދައްކާ އޮތް ބިލުތަކުގެ ޖުމްލަ 1.8 ބިލިއަނަށް އަރާފައިވާކަމަށް ވަނީ މައުލޫމާތު ލިބިފައިވެއެވެ.
