މާލޭގައި ފެންބޮޑުވުން: ތިން ގެއަކަށް ފެން ވަދެ، ހިފައި ގެންގުޅޭ ސާމާނަށް ގެއްލުން ވެއްޖެ
މިއަދު ހެނދުނު މާލެއަށް ބޯކޮށް ވާރޭވެހުމުގެ ސަބަބުން ތިން ގެއަކަށް ފެން ވަދެ, ހިފައި ގެންގުޅޭ ސާމާނަށް ގެއްލުންވެފައިވާ ކަމުގެ މަޢުލޫމާތު ލިބިފައިވާ ކަމަށް ނެޝަނަލް ޑިޒާސްޓާރ މެނޭޖްމަންޓް އޮތޯރިޓީ (އެންޑީއެމްއޭ) އިން ވިދާޅުވެއްޖެއެވެ.
ފެން ބޮޑުވާ ސަރަހައްދުތަކުގައި ވެލިބަސްތާ ޖެހުމަށް ބޭނުންވާ ގޯނި އެ އޮތޯރިޓީން ވަނީ މާލެ ސިޓީ ކައުންސިލަށް ފޯރުކޮށްދެއްވައިފައެވެ.
އެންޑީއެމްއޭއިން ވިދާޅުވި ގޮތުގައި ފެންބޮޑުވުމުގެ ސަބަބުން ގޭތެރެއަށް ނަޖިސް ބޭރުވުމާއި ބައެއް ފަރުނީޗަރާއި ހިފައި ގެންގުޅޭ ސާމާނަށް ގެއްލުން ލިބިގެން ތިން ގެއަކުން އެ އޮތޯރިޓީއަށް ރިޕޯޓުކުރިއެވެ.
އެ އޮތޯރިޓީން ވަނީ އެ ގެތަކަށް ލިބުނު ގެއްލުންތައް ބައްލަވައިފައެވެ.
މިއަދު މާލޭގެ މަގުތަކުގައި ވަރަށް ބޮޑަށް ވަނީ ފެންބޮޑުވެފައެވެ. މިކަމާ ގުޅިގެން، މާލެ ސިޓީގެ މޭޔަރު ޑރ.މުޙައްމަދު މުއިއްޒު ވިދާޅުވީ، ބޯކޮށް ވާރޭ ވެހި މާލޭ ސިޓީގެ މަގުތަކުގައި ފެންބޮޑުވީ ސްޓޯމް ވޯޓަރ ސިސްޓަމް ބަލަހައްޓާ ފަރާތުން ޕަންޕުތައް ނުޖައްސާ ހުރުމުން ކަމަށެވެ.
Ads by STO
