ނައީމާގެ ގާތިލުން އިންސާފުގެ ކުރިމައްޗަށް ގެނައުމަށް ނާޒިމް ގޮވައިލައްވައިފި
ނ.މަނަދޫގައި އަންހެނަކު މަރައިލި މައްސަލައިގައި ހިމެނޭ މީހުންނަށް ޙައްޤު އަދަބު ދިނުން އަވަސް ކުރުމަށް އެމްއެންޕީގެ ރައީސް މުޙައްމަދު ނާޒިމް ގޮވައިލައްވައިފިއެވެ.
މަނަދޫގައި ނައީމާ އުމަރު ކިޔާ އުމުރުން ދުވަސްވީ މީހާ މަރައިލި މައްސަލައިގެ ތަޙުޤީޤަށް، ފުލުހުންގެ ފޮރެންސިކް ޓީމެއް އަންނަނީ ހަރަކާތްތެރިވަމުންނެވެ. އަދި މައްސަލަ ބަލަމުންދާތީ، އެ ރަށަށް އަރައި ފޭބުންވެސް ވަނީ މަނާ ކޮށްފައެވެ.
ނާޒިމް ކުރެއްވި ޓްވީޓެއްގައި ވަނީ ނަޢީމާގެ މަރުގެ ޚަބަރު އެއްސެވީ ފުން ހިތާމައާއެކުގައި ކަމަށާއި، އޭނާގެ ގާތިލުން، ވީ އެންމެ އަވަހަށް އިންސާފުގެ ކުރިމައްޗަށް ގެނައުމަށް ގޮވައިލައްވާ ކަމަށެވެ.
މީހުން މެރުމުގެ މައްސަލަތައް، ރާއްޖޭގައި އިތުރުވަމުން އަންނަކަން ފާހަގަކުރައްވައި، ނާޒިމް ވަނީ ރައްޔިތުންނަށްޓަކައި އަމާންކަން ކަށަވަރު ކޮށްދިނުމަށްވެސް އެދިވަޑައިގެންފައެވެ.
މި މައްސަލައާ ގުޅިގެން ފުލުހުން ވިދާޅުވީ، މަނަދޫ ގެއެއްގައި އެކަނި ދިރިއުޅެމުންދާ 62 އަހަރުގެ އަންހެނަކުގެ ޚަބަރެއް ނުވާތީ، އޭނާގެ އާއިލާއިން، 7 އޭޕްރީލް ވީ ހުކުރު ދުވަހު 18:13 ހާއިރު ފުލުހުންނަށް ރިޕޯޓު ކޮށްފައިވާ ކަމަށެވެ. އަދި ފުލުހުން އެގެއަށް ގޮސް، އެގޭ ކޮޓަރީގެ ދޮރު ވައްޓައިލައިގެން ވަދެ ބެލިއިރު، ނައީމާ އޮތީ މަރުވެފައި ކަމަށް ވެސް ފުލުހުން މަޢުލޫމާތު ދިނެވެ.
މަޢުލޫމާތު ލިބިފައިވާ ގޮތުގައި، ނައީމާގެ ހަށިގަނޑުގެ އެތަން މިތަނަށް ވަޅިހަރާފައިވެއެވެ. ނަމަވެސް ފުލުހުން މިކަން ކަށަވަރު ކޮށްދީފައެއް ނުވެއެވެ.
Ads by STO
