އާރުޑީސީ އާއި ހަވާލު ކުރާމަސައްކަތް ނުނިންމޭކަމަށް ވައްޑޭ ވިދާޅުވުމުން މޫކޭ ރައްދުދެއްވައި، ދެބޭފުޅުންގެ ބަހުގެ ހަމަލާތަކެއް!
އާރުޑީސީ އާއި ހަވާލު ކުރާ މަސައްކަތް ނުނިންމޭކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު މުޙައްމަދު ވަހީދު (ވައްޑޭ) ވިދާޅުވުމުން އާރުޑީސީގެ މެނޭޖިން ޑިރެކްޓަރު މޫސާ ޢަލީ މަނިކު (މޫކޭ) ރައްދު ދެއްވައިފިއެވެ.
ދެބޭފުޅުންގެ ބަހުގެ ހަމަލާ ބަދަލުކުރުންތަކެއް ޝޯޝަލް މީޑިއާއިން ފެނިގެންދިޔަ މިމައްސަލަ ފެށިފައިވަނީ އަލިފުށީ މަގުތަކުގައި ތާރު އެޅުމުގެ މަސައްކަތް އާރުޑީސީއާއި ހަވާލުކުރުމުން ވައްޑޭ އެކަމާ ފާޑުވިދާޅުވެ ޓްވީޓެއް ކުރުމުންނެވެ. މިގޮތުން ވައްޑޭ ކުރި ޓްވީޓުގައި ވިދާޅުވީ އާރުޑީސީއާއި އެމަޝްރޫޢު ހަވާލުކުރީ ކޮންމެހެން މަގު ހަދަން ނޫންކަމަށާއި ރިޔާސީ އިންތިޚާބަށް ކެމްޕޭނު މަސައްކަތް ކުރާނެ މުސާރަވެރި އިތުރު ފަސްދޮޅަހަކަށް މީހުން ކުއްޔަށް ނަގަންކަމަށެވެ.
"ކޮންމެހެން މަގު ހަދާކަށް ނޫން. ރިޔާސީ އިންތިޚާބަށް ކެމްޕޭނު މަސައްކަތް ކުރާނެ މުސާރަވެރި އިތުރު ފަސްދޮޅަހަކަށް މީހުން ކުއްޔަށް ނަގަން ކުރާކަމެއް. އެހެންނޫންނަމަ ހަތަރު އަހަރުވީއިރު، އެންމެ ރަށެއްގެ މަގު މަސައްކަތް ތިޔަ ކުންފުންޏަށް ނިންމާލެވުނީސް." ވައްޑޭ ވިދާޅުވިއެވެ.
ވައްޑޭގެ ޓްވީޓަށް ރިޕްލައި ކުރައްވާ މޫކޭ ވިދާޅުވީ ގުނަން ހުންނެވުމަށާއި މަސައްކަތްތައް ނިންމާލައްވާމަށެވެ. އަދި ރަށް ރަށުގެ ރައްޔިތުންނަށް ވަޒީފާގެ ފުރުސަތު ވެސް މި ސަރުކާރުން ދިން ވަރަށް އެއްވެސް ބަޔަކަށް ނުދެވޭނެ ކަމަށްވެސް މޫކޭ ވިދާޅުވިއެވެ.
މިއާއެކު މޫކޭއަށް ރައްދު ދެއްވައި، ވައްޑޭ ވިދާޅުވީ 2019 ގައި 385 ދުވަހުން ނިންމަން ހަވާލުކުރި މަސައްކަތް އަދިވެސް ހުރީ "ހާވާލާފައި" ކަމަށެވެ. ރައްދުގައި މޫކޭ ވިދާޅުވީ 2019 ގެ ފަހުން ލަސްވެގެން ދިޔަ ސަބަބު ލިޔެކިޔުމުން ފެންނަން ހުންނާނެކަމަށެވެ.
"ޓްވީޓް ކުރަން އިންނަ މީހަކަށް ހާވާހެން ހީވެދާނެ. 2019 ގެ ފަހުން ލަސްވެގެން ދިޔަ ސަބަބު ހުންނާނެ ލިޔެކިޔުމުން ފެންނަން. އާމީނީ މަގުގެ މަސައްކަތް ޕްލޭން ކުރެވުނީ 24 ގަޑިއިރު މަސައްކަތް ކުރާ ގޮތަށް. އެގޮތަށް އެކަން ނުކުރެވުނީ އެހެން ކުންފުނި ތަކުން އެކަމަށް އެއްބަސް ނުވެވިގެން" މޫކޭ ވިދާޅުވިއެވެ.
ވަރަށް ގިނަ ރަށްރަށުގައި މަގު ހެދުމުގެ މަސައްކަތް ސަރުކާރުން ވަނީ އާރްޑީސީ އާއި ހަވާލު ކޮށްފައެވެ. ނަމަވެސް ވަރަށް ގިނަ ރަށްރަށުގެ ސަރުކާރާއި އިދިކޮޅު ފަރާތްތަކުން ދަނީ މަސައްކަތް ލަސްވަމުން ދާތީ ކަންބޮޑުވުން ފާޅުކޮށް، ސަރުކާރަށާއި އާރްޑީސީ އަށް ފާޑުކިޔަމުންނެވެ.
