ޖީ7ގެ ބައްދަލުވުމުގައި ޗައިނާއާއި ޔޫކްރެއިން
ސިނާޢީ ގޮތުން އެންމެ ކުރިއަރާފައިވާ ގްރޫޕް އޮފް ސެވަން (ޖީ7)ގެ ޤައުމުތަކުގެ ޚާރިޖީ ވަޒީރުންގެ ބައްދަލުވުމެއް ޖަޕާނުގެ ރިސޯޓު ރަށެއް ކަމުގައިވާ ކަރިއުޒަވާގައި ފަށައިފިއެވެ. މި ބައްދަލުވުމުގައި އެޖެންޑާގެ އެންމެ ކުރީގައި އޮތީ ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައާއި، ތައިވާނުގެ މިނިވަންކަމާއި ސިޔާދަތަށް ޗައިނާއިން ބާރުފޯރުވަން ކުރަމުންދަ މަސައްކަތްތަކާ ގުޅޭ މައްސަލައެވެ.
މި ބައްދަލުވުމުގެ މައިގަނދު މަޤުޞަދަކީ އަންނެ މޭ މަހު ބޭއްވުމަށް ހަމަޖެހިފައިވާ ޖީ7ގެ ޤައުމުތަކުގެ ލީޑަރުންގެ ބައްދަލުވުމަށް ތައްޔާރުވުމެވެ. އެ ބައްދަލުވުން އޮންނާނީ ޖަޕާނުގެ ހީރޯޝީމާގައެވެ. އެ ބައްދަލުވުމުގައި ވެސް އަލިއަޅުވައިލުމަށް ހަމަޖެހިފައިވާ ބައެއް މުހިންމު ކަންކަމުގެ ތެރޭގައި ރަޝިޔާއާއި ޗައިނާގެ މައްސަލައިގެ އިތުރުން އޭޝިޔާ ބައްރުގެ ޤައުމުތަކުގެ އަދުގެ ހާލަތު ހިމެނެއެވެ. ނިއުކްލިޔަރ ހަތިޔާރުގެ ބިރުވެރިކަން ނައްތައިލުމާ ގުޅޭ ގޮތުން މަޝްވަރާކުރުމަށް ވެސް ޖަޕާނުގެ ބޮޑުވަޒީރު ފުމިޔޯ ކިޝިޑާ ބޭނުންފުޅުވެ ވަޑައިގަންނަވެއެވެ.
ޖީ7ގެ ޚާރިޖީ ވަޒީރުންގެ ބައްދަލުވުން ފަށާފައި މި ވަނީ، ތައިވާން ކައިރީގައި ޗައިނާއިން ހިންގި ވަރުގަދަ އަސްކަރީ ތަމްރީނުތަކެއް ނިންމައިލުމާ ދިމާކޮށެވެ. އަދި، އުތުރު ކޮރެޔާއިން އަލަށް އުފެއްދި ސޮލިޑް ފިޔުލް ބޭނުންކުރާ އިންޓަރކޮންޓިނެންޓަލް ބެލިސްޓިކް މިސައިލް (އައި.ސީ.ބީ.އެމް)އެއް ޓެސްޓުކޮށްފައިވާ ދަނޑިވަޅެއްގައެވެ.
އޭޝިޔާ ސަރަޙައްދު، ޚާއްޞަކޮށް ޖަޕާން އޮންނަ ސަރަޙައްދުގެ ސަލާމަތާއި ރައްކާތެރިކަން ކަށަވަރު ކުރުމަށް ކުރެވިދާނެ ކަންކަމާ މެދު ޖީ7ގެ ޚާރިޖީ ވަޒީރުންގެ ބައްދަލުވުމުގައި މުހިންމު މަޝްވަރާތަކެއް ކުރަން ހަމަޖެހިފައިވާ ކަމުގައި ޖަޕާނުން ބުނެއެވެ. އަދި، ރަޝިޔާ-ޔޫކްރެއިން ހަނގުރާމައާ ގުޅިގެން، އޭޝިޔާ ސަރަޙައްދުގެ ސަލާމަތާއި ރައްކާތެރިކަން ކަށަވަރުކުރަން ގިނަގުނަ މަސައްކަތްތަކެއް ކުރަން ޖެހިފައިވާ ކަމުގައި ވެސް ޖަޕާނުން ގަބޫލުކުރެއެވެ.
"ރަޝިޔާ-ޔޫކްރެއިން ހަނގުރާމައާ ގުޅިގެން ނުރައްކާވެފައި ވަނީ ހަމައެކަނި ވިލާތުގެ ޤައުމުތަކަށް އެކަންޏެއް ނޫން. އޭޝިޔާ ބައްރުގެ ޤައުމުތަކަށް ވެސް އެ ކަމުގެ ނުރައްކަލާއި ބިރުވެރިކަން އެބައޮތް. އަދި، ނޭދެވޭ އަސަރުތައް ދަނީ ކުރަމުން. ވިލާތާއި އޭޝިޔާގެ ހުރިހާ ޤައުމެއްގެ ސަލާމަތާއި ރައްކާތެރިކަމާ މެދު އެންމެން ގުޅިގެން މަޝްވަރާކުރުން މުހިންމު،" ޖަޕާނުގެ ސަރުކާރުން ނެރުނު ބަޔާނެއްގައި ބުންޏެވެ.
ތައިވާނުގެ މިނިވަންކަމާއި ސިޔާދަތަށް ނުރައްކާ ކުރަން ޗައިނާއިން މަސައްކަތް ކުރަމުންދާ ކަމަށް ޖީ7އިން ދަނީ ތުހުމަތު ކުރަމުންނެވެ. އަދި، ތައިވާނުގެ މިނިވަންކަމާއި ސިޔާދަތަށް އަރައިގަނެ، އެ ޤައުމު ހިފުމާ ދެކޮޅަށް ޖީ7އިން ދަނީ އަޑުއުފުލަމުންނެވެ. ޖީ7ގެ މެންބަރު ޤައުމުތަކުން ވަކިން ވެސް ދަނީ މި މައްސަލައިގައި ޗައިނާއާ ދެކޮޅަށް ބަސް ބުނަމުންނެވެ.
"ތައިވާން ކަނޑުގައި އަސްކަރީ ހަރަކާތްތައް އިތުކޮށް، ކުރިމަތިލުމެއް ހިނގުމަކީ މުޅި ދުނިޔެއަށް އޮތް ނުރައްކަލެއް،" ޖަރުމަނުވިލާތުގެ ޚާރިޖީ ވަޒީރު އެނެލީނާ ބެއަރްބޮކް ވިދާޅުވިއެވެ. ނަމަވެސް، މި ފަދަ ކަންކަމާ ވިލާތުން ބަސްބުނުމާ ދެކޮޅަށް ފަރަންސޭސިވިލާތުގެ ރައީސް އެމަނުއެލް މެކްޚޯން ދާދި ފަހުން ވަނީ ވާހަކަފުޅު ދައްކަވާފައެވެ. އޭނާ މި މޭރުމުން ވާހަކަފުޅު ދައްކަވާފައި ވަނީ ޗައިނާއަށް އޭނާ ކުރެއްވި ދަތުރުފުޅެއްގެ ތެރެއިންނެވެ.
ޖަޕާނުގައި ކުރިއަށްދާ ޖީ7ގެ ޚާރިޖީ ވަޒީރުންގެ ބައްދަލުވުމުގައި ރަޝިޔާ-ޔޫކްރެއިން ހަނގުރާމައާ ގުޅޭ ގޮތުން މަޝްވަރާކުރުމަށް ހަމަޖެހިފައިވީ ނަމަވެސް، ރަޝިޔާއާ ދެކޮޅަށް އިތުރު ފިޔަވަޅުތަކެއް އެޅުމަށް މަޝްވަރާކުރާނެ ކަމަށް ނުބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. "ރަޝިޔާއިން ޔޫކްރެއިނުގައި ކުރަމުންދާ ހަނގުރާމަ ދިގުދަންމައިގެން [ރަޝިޔާގެ ރައީސް ވްލަޑިމިޔަރ] ޕުޓިންއަށް ކުރިއެރުމެއް ނުލިބޭނެ،" ބެއަރބޮކް ވިދާޅުވިއެވެ.
