އިންޑިއާގެ ސެރަމް އިންސްޓިޓިއުޓް އިން ގާނާއަށް މެރޭރިއާ ވެކްސިން ފޯރުކޮށްދެނީ
ވެކްސިން އުފައްދާ ކުންފުނި ސީރަމް އިންސްޓިޓިއުޓް އޮފް އިންޑިއާއިން އޮކްސްފޯޑް ޔުނިވާސިޓީގެ އާރް21 މެލޭރިއާ ވެކްސިން މި މަހު ހުއްދަ ދިން ގާނާގައި ފިލް ފިނިޝިން ކުރުމާ ބެހޭ ގޮތުން މަޝްވަރާ ކުރަމުން އަންނަ ކަމަށް ގާނާގެ ވެކްސިން ތަޖުރިބާކާރަކު ބުރާސްފަތި ދުވަހު ބުނެފި އެވެ.
ފިލް ފިނިޝިންއަކީ ބޭސް އުފެއްދުމާއި ޕެކޭޖިންގެ އެންމެ ފަހު މަރުހަލާއެވެ.
ގާނާ އާއި ނައިޖީރިއާއިން މި ވެކްސިނަށް ހުއްދަ ދިނުމަކީ އާދަޔާ ހިލާފު ކަމެއް ކަމަށާއި ސަބަބަކީ ފައިނަލް ސްޓޭޖުގެ ޓްރަޔަލް ޑޭޓާ އަދި ވެސް ޝާއިއުކޮށްފައި ނުވާތީ އާއި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން އަދިވެސް އެ ވެކްސިންގެ ސަލާމަތާއި ރައްކާތެރިކަން ދެނެގަތުމުގެ މަސައްކަތް ކުރަމުންދާތީ އެވެ.
ގާނާއިން އަދި އަމިއްލަ ވެކްސިނެއް ނުއުފެއްދި ނަމަވެސް ލޯކަލް ފާމް ޑީއީކޭ ވެކްސިންސް ލިމިޓެޑުން އަންނަނީ ކުރިއަށް އޮތް ދެ އަހަރުގެ ތެރޭގައި ވެކްސިން އުފެއްދުމުގެ މަސައްކަތް ފެށުމަށް ތައްޔާރުވަމުންނެވެ.
"ސީރަމް އިންސްޓިޓިއުޓް ހަގީގަތުގައި ގާނާގައި ހުރީ ޑީއީކޭ ވެކްސިންސް ލިމިޓެޑާ އެކު މަޝްވަރާ ކުރަމުން... އާރް21 ފިލް-ފިނިޝްކޮށް ގާނާގައި އުފެއްދޭނެ ގޮތް ބަލަނީ،" ޑަބްލިއުއެޗްއޯގެ އެފްރިކާ އޮފީހުން ބޭއްވި ނިއުސް ކޮންފަރެންސެއްގައި ގާނާގެ ވެކްސިން އުފެއްދުމާއި ތަރައްގީއާ ބެހޭ ރިޔާސީ ކޮމިޓީގެ ސެކްރެޓަރީ ވިލިއަމް އެމްޕޯފޯ ވިދާޅުވި އެވެ.
މަދިރީގެ ޒަރިއްޔާއިން ފެތުރޭ މެލޭރިއާގެ ސަބަބުން އަހަރަކު ހަ ލައްކައަށްވުރެ ގިނަ މީހުން މަރުވާއިރު އޭގެ ތެރޭގައި ގިނައީ އެފްރިކާގެ ތުއްތު ކުދިންނާއި ކުޑަކުދިންނެވެ.
