ތައިވާން ސްޓްރެއިޓަކީ ޗައިނާގެ ބައެއް: ޗިން ގަންގް
ޗައިނާއާއި ތައިވާނާ ދެމެދު އޮންނަ ކަނޑު ސަރަޙައްދު ކަމުގައިވާ "ތައިވާން ސްޓްރެއިޓް"ގެ ދެ ފަރާތަކީ ވެސް ޗައިނާގެ ބައިތަކެއް ކަމުގައި އެ ޤައުމުގެ ޚާރިޖީ ވަޒީރު ޗިން ގަންގް ވިދާޅުވެއްޖެއެވެ. ޗައިނާގެ ވިޔަފާރީގެ މަރުކަޒީ ރަށް ޝެންގްހާއީގައި ކުރިއަށްދާ ލެންޓިންގް ފޯރަމްގައި ވާހަކަފުޅު ދައްކަވަމުން ޗިން ވިދާޅުވީ ތައިވާން ސްޓްރެއިޓްގެ ސަލާމަތާއި ރައްކާތެރިކަން ކަށަވަރު ކުރުމަކީ ޗައިނާގެ މިނިވަންކަމާއި ސިޔާދަތު ޙިމާޔަތްކުރުމަށް މުހިންމު ކަމެއް ކަމުގައެވެ.
"ތައިވާން ސްޓްރެއިޓްގެ ރައްކާތެރިކަމާއި ހަމަޖެހުން ނަގައިލަން ޗައިނާއިން މަސައްކަތް ކުރާ ކަމުގެ ތުހުމަތުތައް ފަހަކަށް އައިސް ވަނީ އިތުރުވެފައި. އެއީ އެއްވެސް އޮއްޓަރެއް ނެތް ވާހަކަތަކެއް. އެ ސަރަޙައްދުގެ ރައްކާތެރިކަމާއި ހަމަޖެހުން ނަގައިލަން އުޅެނީ ކޮން ބަޔެއް ކަން ފިކުރުކުރާ ކޮންމެ މީހަކަށް ވިސްނޭނެ. އެއީ ޗައިނާއިން ކުރާ ކަމެއް ނޫން. އެ ކަމުގައި ފަހަތުގައި ތިބީ ތައިވާނުގެ މިނިވަންކަމަށް ދަޢުވާ ކުރާ މީހުން. އެ މީހުންނަށް ބޭރު ޤައުމުތަކުން ދަނީ ހިތްވަރުދެމުން،" ޗިން ވިދާޅުވިއެވެ.
ތައިވާނުގެ މައްސަލައިގައި އަލިފާނާ ކުޅޭ ފަރާތްތަކުން ވިސްނަންވި ކަމަކީ، އަލިފާނާ ކުޅުމަކީ ރައްކާތެރި ކަމެއް ނޫން ކަމާއި، އަލިފާނާ ކުޅޭ ނަމަ ފިހޭނެ ކަން ކަމުގައި ވިދާޅުވެ ޗިން ވަނީ އިންޒާރު ވެސް ދެއްވާފައެވެ. އޭނާ އިޝާރާތް ކުރައްވާފައި މި ވަނީ އެމެރިކާއަށެވެ. ތައިވާނުގެ މިނިވަންކަމުގެ މައްސަލައިގައި ޗައިނާއާއި އެމެރިކާއާ ދެމެދު ވަނީ ދެބަސްވުން އުފެދިފައެވެ.
ދެކުނު އެމެރިކާގެ ދެ ޤައުމަކަށް ދާދިފަހުން ކުރެއްވި ދަތުރުފުޅެއްގެ ތެރެއިން ތައިވާނުގެ ރައީސް ސައި އިންގް-ވެން ވަނީ އެމެރިކާއަށް ވެސް ވަޑައިގަންނަވާފައެވެ. ޗައިނާގެ ނުރުހުމުގައި ސައި ކުރެއްވި މި ދަތުރުފުޅުގައި އެމެރިކާގެ ހައުސް އޮފް ރެޕްރެޒެންޓެޓިވްސްގެ ރައީސް ކެވިން މެކާތީއާ އޭނާ ވަނީ ބައްދަލުކުރައްވާފައެވެ.
އެ ބައްދަލުވުމާ މެދު ނުރުހުންވެ ޗައިނާއިން ވަނީ ތައިވާން ވަށައިގެންވާ ކަނޑުގެ ސަރަޙައްދުގައި ވަރުގަދަ އަސްކަރީ ތަމްރީނުތަކެއް ބާއްވާފައެވެ. ހުއްވި 2022 ވަނަ އަހަރު ހައުސްގެ ކުރީގެ ރައީސާ ނެންސީ ޕެލޯސީ ވެސް ވަނީ ތައިވާނަށް ދަތުރުފުޅެއް ކުރައްވައި، ޗައިނާ ރުޅިއަރުވައިލައްވާފައެވެ.
ތައިވާނަކީ ޗައިނާގެ ބައެއް ކަމަށް ޗައިނާއިން ގަބޫލު ކުރެއެވެ. އެއީ، ޑިމޮކުރަސީގެ ހަމަތަކުގެ މަތިން ވެރިކަން ކުރާ ތަނެއް ނަމަވެސް، ބާރުގެ ބޭނުންކޮށްގެން ތައިވާން ހިފަން ޗައިނާއިން ބޭނުންވެއެވެ. ނަމަވެސް، ތައިވާނަކީ މިނިވަން ދަޢުލަތެއްގެ ގޮތުގައި އެމެރިކާއިން ގަބޫލުކުރެއެވެ. އަދި، އެމެރިކާއިން ދަނީ އެކި ގޮތްގޮތުން ތައިވާނާ އެކު ގުޅުން ބަދަހި ކުރަމުންނެވެ.
