ހުޅުމާލޭގެ ފޭސް1 ގައި ތަޢުލީމީ މަރުކަޒެއް އަޅަނީ
ހުޅުމާލޭގައި އެޑިއުކޭޝަނަލް އިންސްޓިޓިއުޓެއް ބިނާކުރުމަށް އަލް މަދީނާ އިންވެސްޓްމެންޓް ޕްރައިވެޓް ލިމިޓެޑާއި އެކު، އާބަންކޯއިން ފްރޭމްވޯރކް އެއްބަސްވުމެއްގައި ސޮއިކޮށްފައެވެ.
މި އެއްބަސްވުމުގައި އަރބަންކޯގެ ފަރާތުން ސޮއިކުރެއްވީ، އެކުންފުނީގެ މެނޭޖިންގ ޑިރެކްޓަރ އަޙުމަދު އާތިފެވެ.
އަދި އަލް މަދީނާ އިންވެސްޓްމެންޓްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އަލީ އަޙްސަންއެވެ.
އާބަންކޯއިން އަންނަނީ ހުޅުމާލޭގެ ތަރައްޤީއަށްޓަކައި، މިފަދަ މަޝްރޫޢުތައް ހިންގަމުންނެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ނަން ރީބްރޭންޑްކޮށް އެ ކުންފުނީގެ ނަން "އާބަންކޯ"އަށް ބަދަލު ކުރީ، އެ ކުންފުންޏަށް 22 އަހަރު ފުރުމާ ގުޅިގެންނެވެ.
އެ ކުންފުނިން ބުނީ މި ބަދަލު ގެނައުމުގެ މަޤްޞަދަކީ ރައްޔިތުންނަށް އިތުރު ފުރިހަމަ ޚދުމަތް ދިނުމާއެކު ރާއްޖޭގެ އެންމެ ބޮޑު އާބަން ޑިވެލޮޕްމަންޓް ކުންފުނީގެ ފުރިހަމަ ލަގަބު ހޯދުމަށް މަސައްކަތް ކުރުން ކަމަށެވެ.
އަދި ކުންފުނި ރީބްރޭންޑް ކުރީ ރައްޔިތުން ދެކޭ ހުވަފެންތައް ހަގީގަތަކަށް ހަދައިދިނުމަށް ބައިވެރިއެއްގެ ގޮތުގައި މަސައްކަތް ކުރުމަށް ކަމަށް ވެސް އެ ކުންފުނިން ބުނެއެވެ.
