ސްޕްރީމް ކޯޓުން ވެސް ނިންމީ ރައީސް ޔާމީނާ ދެކޮޅަށް!
ފުއްގިރި މައްސަލައިގައި އަދީބާއި ޒިޔަތުގެ ހެކި ބަސް ނެގުމާ ދެކޮޅަށް ރައީސް ޔާމީންގެ ފަރާތުން ސުޕްރީމް ކޯޓަށް ހުށަހެޅި އިސްތިއުނާފީ މައްސަލަ, އެމަނިކުފާނާ ދެކޮޅަށް ނިންމަވައިފިއެވެ.
މިގޮތަށް މައްސަލަ ނިންމާފައިވަނީ މައްސަލަ ބެއްލެވި ތިން ފަނޑިޔާރުންގެ އިއްތިފާޤުންނެވެ. މައްސަލަ ބެއްލެވި އިސް ފަނޑިޔާރަކީ ހުސްނުއްސޫދެވެ. މައްސަލައިގެ ބެންޗުގައި ދެން ތިއްބެވީ, ފަނޑިޔާރު މުޙައްމަދު އިބްރާހީމާއި ފަނޑިޔާރު އައިޝަތު ޝުޖޫންއެވެ.
ރައީސް ޔާމީންގެ ފަރާތުން ވަނީ ދައުލަތުން ހެކީގެ ގޮތުގައި ހުށަހެޅި, އަދީބާއި ޒިޔަތުގެ ހެކި ބަލަައިނުގަތުމަށް ދަށު ކޯޓުގައި އެދިފައެވެ. ނަމަވެސް އެ ކޯޓުން ހެކި ބަލައިގަންނަން ނިންމުމުން, މައްސަލަ ހައި ކޯޓަށް ވެއްދިއެވެ. ހައި ކޯޓުން ވެސް ނިންމީ އެ ދެމީހުންގެ ހެކި ބަލައިގަނެވޭނެ ކަމަށެވެ.
މި މައްސަލައި މިރޭ ސްޕްރީމް ކޯޓުން ވެސް ނިންމާފައިވަނީ ހެކި ބަލައިގަނެވޭނެ ކަމަށެވެ. އަދި ހައި ކޯޓުގެ ޙުކުމަށް ބަދަލު ގެންނަން ޖެހޭ ސަބަބެއް ނެތް ކަމަށެވެ.
މިރޭ ސުޕްރީމް ކޯޓުގައި ބޭއްވި ޝަރީޢަތުގެ މަޖިލީހުގައި ފަނޑިޔާރު ހުސްނުއްސުއޫދު ކުރެއްވި ޙުކުމުގައި ވަނީ މިމައްސަލާގައި ހައި ކޯޓުން ކޮށްފައިވާ ޙުކުމަށް ބަދަލު ގެންނަންޖެހޭ އެއްވެސް ސަބަބެއް ނެތްކަަމަށާއި، މި ޙުކުމަށް ވާސިލުވުމަށް ސުޕްރީމްކޯޓުން ފާހަގަ ކޮށްފައިވާ ކަންކަމާއި ތައާރުޒްވާ މިންވަރަށް ހައި ކޯޓުގެ ޙުކުމުގައި ބަޔާން ކޮށްފައިވާ ކަންކަން ބާތިލުވާނެ ކަމަށެވެ.
ފަނޑިޔާރު ހުސްނުއްސުުއޫދުވަނީ، ދަށުކޯޓުގައި ހިނގަމުންދާ ފުއްގިރި މައްސަލާގައި އަދީބުއާއި ޒިޔަތުގެ ހެކިބަސް ބަލައި ނުގަނެވޭނެކަމަށް ޔާމިންގެ ވަކީލުން ފާހަގަކޮށްފައިވާ އެންމެހާ ނުކުތާތަކަށް ޖަވާބު ދެއްވައިފައެވެ.
