މަޖިލިސް ހުއްޓުވައިފައިވަނީ، ރައީީސް ޞާލިޙު އިސްވެ ހުންނަވައިގެން: އިދިކޮޅު މެމްބަރުން
އެމްޑީޕީ އިސްވެ އޮވެ، ރައްޔިތުންގެ މަޖިލިސް ހުއްޓުވައިފައިވާ ކަމަށް ބުނެ، މަޖިލީހުގެ ސިޔާސީ ޕާޓީތަކުން ކަންބޮޑުވުންފާޅުކޮށްފިއެވެ.
ޕީޕީއެމް-ޕީއެންސީ، ޖޭޕީ، އަދި ދަ ޑިމޮކްރެޓްސްގެ މެމްބަރުން ބޭއްވެވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، މެދު ހެންވޭރު ދާއިރާގެ މެމްބަރު ޢަލީ ޢާޒިމް ތުހުމަތު ކުރެއްވި ގޮތުގައި، މަޖިލިސް ހުއްޓުވައިފައިވަނީ، ރައީސް އިބްރާހީމް މުޙައްމަދު ޞާލިޙު އިސްވެ ހުންނަވައިގެންނެވެ. އޭނާ ވިދާޅުވި ގޮތުގައި، މިކަން ކުރަނީ، ދެ ކަމެއް ހާސިލު ކުރާށެވެ.
އެގޮތުން މަޖިލިސް ތެރެއިން ސަރުކާރު ޖަވާބުދާރީ ކުރުވުން ހުއްޓުވުމާއި، ސަރުކާރުގެ ވައްކަމާއި ކޮރަޕްޝަނުގެ ވާހަކަ ދެއްކުން ހުއްޓުމަކީ، މަޖިލިސް ކުރިއަށް ދިޔަ ނުދޭ ސަބަބެއް ކަމަށް އޭނާ ވިދާޅުވިއެވެ.
"އޭގެ އެއް މަަޤްޞަދަކީ ރާއްޖޭން ބައެއް ގެއްލިފައިވާކަން، ވިއްކައިލައިފައިވާކަން، އެކަން ރުޖޫޢަކުރުމަށްޓަކައި، އަނބުރާ ހޯދުމަށްޓަކައި އަޅުގަނޑުމެން މިދަނީ މަސައްކަތް ކުރަމުން. މި ސަރުކާރު ނިމުމަކަށް ގެނައުމަށް، އަޅުގަނޑުމެން އެއްބަސްވެ، ނުރަސްމީކޮށް މަސައްކަތް ކުރަމުންދާތާ ދުވަސްކޮޅެއް ވެއްޖެ."
ޢާޒިމް ވަނީ އެމްޑީޕީ މެމްބަރުން މަޖިލިސް ހުއްޓުވަން ނިޒާމީ މައްސަލަ ނެގީ، މަޖިލީހުގެ ނައިބު ރައީީސް އީވާގެ އިތުބާރު ނެތް މައްސަލަ އެޖެންޑާ ކޮށްފައި ނެތުމާއި، މަޖިލީހުގެ ރިޔާސަތުގައި ވިލުފުށި ދާއިރާގެ މެމްބަރު ޙަސަން އަފީފު އިންނެވުމުންކަން ފާހަގަކުރައްވައިފައެވެ. އޭނާ ވިދާޅުވީ، މަޖިލީހުގެ ރިޔާސަތު ބަލަހައްޓަވަން، ރައީީސް އާއި ނައިބު ރައީީސް އުޒުރުވެރި ވެއްޖެނަމަ، ކަން ކުރަންޖެހޭ ގޮތް، މަޖިލީހުގެ ޤަވާއިދުގައި ސާފުކޮށް ބަޔާާންކޮށްފައިވާ ކަމަށެވެ.
