މަޖިލީހުގައި މަރުތަޅު ނޭޅުވޭގޮތް ހަދަން އެމްޑީޕީން އިސްލާހުތަކެއް ހުށަހަޅައިފި
ރައްޔިތުންގެ މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅާފައި އޮތްނަމަވެސް އެމައްސަލަތައް ކުރިއަށް ނުގެންދެވި ހުއްޓިފައި އޮތް މައްސަލައާއި ގުޅިގެން، މަޖިލީހުގެ މެޖޯރިޓީ ހިއްސާކުރާ އެމްޑީޕީން ގަވާއިދަށް ބޮޑެތި އިސްލާހުތަކެއް ހުށަހަޅައިފި އެވެ.
މަޖިލީހުގެ ރައީސް މުހައްމަދު ނަޝީދާއި ނައިބު ރައީސް އީވާ އަބްދުﷲ ވެސް ވަނީ އިތުބާރު ނެތްކަމުގެ މައްސަލަ ހުށަހަޅާފައިވާތީ ރިޔާސަތުގައި އިންނަވަން އުޒުރުވެރިވާކަމަށް އިދާރާއަށް އަންގަވައިފަ އެވެ. މިހެންވުމުން ރިޔާސަތު ބަލަހައްޓަވާނެ ބޭފުޅެއް ނެތި މިއަދުވެސް މަޖިލިސް ޖެހުނީ ކެންސަލް ކުރާށެވެ.
އެމްޑީޕީގެ ޕާލިމަންޓަރީ ގުރޫޕުގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް މިއަދު ގަވާއިދަށް އިސްލާހުތަކެއް ހުށަހަޅާފައިވާއިރު އޭގައި ވަނީ މަޖިލީހުގެ ރައީސް ނުވަތަ ނައިބު ރައީސް މަގާމުން ވަކިކުރާ މައްސަލަ ހުށަހަޅާ ޖަލްސާގެ ރިޔާސަތު ބަލަހައްޓަވަން އޭގެ ތެރެއިން އެއްވެސް ބޭފުޅަކު އުޒުރުވެރިވެއްޖެ ހާލަތެއްގައި، ރިޔާސަތު ބަލަހައްޓަވާނެ މެމްބަރަކު މަޖިލީހުގެ އަމީންއާންމު ކަނޑައެޅުއްވުމަށް ހިމަނައިފަ އެވެ.
މީގެ އިތުރުން، މަޖިލީހުގެ ރައީސާއި ނައިބު ރައީސް ވަކިކުރަން ހުށަހަޅާ މައްސަލައެއްގެ ބަހުސްގެ ވަގުތާއި ދިފާއުވުމުގެ ވަގުތު ވެސް އާންމު ކޮމިޓީން ކަނޑައަޅަންނުޖެހޭ ގޮތް ވެސް އެ އިސްލާހުތަކުގެ ތެރޭގައި ހިމެނެ އެވެ. މިގޮތުން، އެފަދަ މައްސަލައެއްގެ ބަހުސްގައި މެމްބަރުން ވާހަކަ ދައްކަވާ ދިގުމިން އަމީންއާންމު ކަނޑައަޅުއްވާ ގޮތަށް ހުށަހަޅުއްވާފައިވާއިރު، ދިފާއުގައި ވާހަކަ ދައްކަވަން މަޖިލީހުގެ ރައީސަށް ލިބިވަޑައިގަންނަވާނީ 30 މިނެޓު ކަމަށް ވަނީ ހިމަނައިފަ އެވެ.
މީގެ އިތުރުން އަސްލަމް ހުށަހެޅި އިސްލާހުގައި ވަނީ ރިޔާސަތު ބަލަހައްޓާ ތަރުތީބަށްވެސް ބަދަލުތަކެއް ގެންނަން ހުށަހަޅައިފަ އެވެ. އެގޮތުން ރައީސާއި ނައިބުރައީސް އުޒުރުވެރިވާ ހާލަތެއްގައި މަޖިލީހުގައި މެދު ނުކެނޑި އެންމެ ގިނަ ދުވަސްވީ މެމްބަރުންގެ ތެރެއިން ޖުމްލަ ފަސް މެމްބަރުން ރިޔާސަތު ބެލެހެއްޓުމަށް މަޖިލީހުގެ ރައީސް ކަނޑައަޅަންޖެހޭނެ ކަމަށް އިސްލާހުގައި ވަނީ ހުށަހަޅައިފަ އެވެ.
މަޖިލީހުގެ ގަވާއިދަށް އަސްލަމް އިސްލާހުތަކެއް ހުށަހެޅުއްވިނަމަވެސް މި އިސްލާހުތައް ފާސްކުރެވޭނީ ޖައްސާއެއް ބޭއްވި އެކަމަށް މެމްބަރުން ރުހުން ދީގެންނެވެ. މިހާރު އެޅިފައިވާ މަރުތަޅު ފިލުވުމަށް މަޖިލިސް އިދާރާއާއިއެކު އެމްޑީޕީ ޕީޖީ ގްރޫޕުން މަޝްވަރާތަކެއް ކުރަމުން ދާއިރު މަޖިލީހުގެ އަމީންއާންމު ވަނީ އެކަން ހައްލުކޮށްދެއްވަން ރައީސް ނަޝީދުގެ އަރިހުން އެދިވަޑައިގެންފަ އެވެ.
