ޑިމޮކްރެޓްްސް ރަޖިސްޓްރީކޮށްނުދޭތީ، ނާޒިމްގެ ކަންބޮޑުވުން
އެމްޑީޕީގެ ރައީސް މުޙައްމަދު ނަޝީދު އިސްވެ ހުންނަވައި އުފައްދަވާ، "ދަ ޑިމޮކްރެޓްސް" އުފެއްދުމުގެ ހުއްދަ ނުދިނުމަކީ، ނުހަނު ކަންބޮޑުވުން އޮތް ކަމެއް ކަމަށް މޯލްޑިވްސް ނެޝަނަލް ޕާޓީ(އެމްއެންޕީ)ގެ ރައީސް މުޙައްމަދު ނާޒިމް ވިދާޅުވެއްޖެއެވެ.
ޑިމޮކްރެޓްސް އުފެއްދުމުގެ ހުއްދަ ހޯދަން އެ ޕާޓީން ވަނީ އިއްޔެ އިލެކްޝަން ކޮމިޝަންގެ އިދާރާއަށް ގޮސްފައެވެ. ނަމަވެސް އިލެކްޝަނުން އެ ހުއްދަ ދީފައެއް ނުވެފައެވެ. އޭގެ ފަހުން ވަނީ ހަރުގެ ޖަލްސާއެއް ބާއްވާ, މަގުމައްޗަށް ނިކުމެ މުޒާހަރާ ވެސްކޮށްފައެވެ.
ނާޒިމް ކުރެއްވި ޓްވީޓެއްގައި ވިދާޅުވީ، ސިޔާސީ ޕާޓީ އުފައްދައި ހިންގުމަކީ ޤާނޫނު އަސާސީން ކަށަވަރުކޮށްދީފައިވާ ހައްޤެއް ކަމަށްވާއިރު، އެހައްގު ހަނިވާގޮތަށް ގާނޫނު މާނަކޮށް"ދަ ޑިމޮކްރެޓްސް" ޕާޓީ އުފައްދަން ހުއްދަނުދީ ހިފެހެއްޓުމަކީ ނުހަނު ކަންބޮޑުވުން އޮތްކަމެއް ކަމުގައެވެ.
"ޤާނޫނު އަސާސީން ކަށަވަރުކޮށްދީފައިވާ ޙައްޤުތައް ހިމާޔަތްކުރުމަކީ ދަޢުލަތުގެ މުއައްސަސާތަކުގެ މައްޗަށް ލާޒިމުކަމެއް."
ޑިމޮކްރެޓްސް އުފެއްދުމުގައި އިސްކޮށް އުޅުއްވަނީ، ރައީސް ނަޝީދުގެ އަރިސް މެމްބަރުންނެވެ. އެ ޕާޓީން ވަނީ، މި އަހަރުގެ ރިޔާސީ އިންތިޚާބަށް ކެންޑިޑޭޓަކު ނެރޭނެ ކަމަށް ވެސް ބުނެފައެވެ.
