ދެ މެމްބަރުން ބޮއިކޮޓް ކުރުމުން، މިއަދުވެސް ޑިމޮކްރެޓްސްއަށް ހުއްދައެއް ނުދެވުނު

ދަ ޑިމޮކްރެޓްސްގެ ނަމުގައި އުފައްދަން މަސައްކަތް ކުރާ ސިޔާސީ ޕާޓީއަށް ހުއްދަ ދިނުމަށް އިލެކްޝަންސް ކޮމިޝަންގައި ބާއްވަން މިއަދަށް ތާވަލު ކުރި ބައްދަލުވުން ދެ މެމްބަރަކު ބޮއިކޮޓް ކުރުމުން ޕާޓީ އުފެއްދުމުގެ ހުއްދަ މިއަދުވެސް ނުދެވުނެވެ.

Ads by Hajj Corporation

ޑިމޮކްރެޓްސް އުފެއްދުމަށް ބޭނުންވާ 3،000 މެމްބަރުންގެ ސޮޔާއިއެކު އެޕާޓީން ވަނީ އިލެކްޝަންސް ކޮމިޝަނަށް ހުށަހަޅައިފަ އެވެ. މެމްބަޝިޕް ފޯމުތަކުގައި މައްސަލަ ޖެހި އަދަދު ހަމަނުވެދާނެތީ އެޕާޓިން ވަނީ ބޭނުންވާ އަދަދުގެ އިތުރަށް 500 އެއްހާ ފޯމު ހުށަހަޅައިފަ އެވެ.

ފޯމުތަކުގެ ސައްހަކަން ކަށަވަރުކޮށް ނިމުނު ނަމަވެސް އުފެއްދުމަށް ކޮމިޝަންގެ މެމްބަރުން ވޯޓު ނުދޭތީ ޕާޓީ އުފެއްދުމަށް ބާއްވަންޖެހޭ ޖަލްސާ އަދިވެސް ނުބޭއްވެ އެވެ. މިއަދު އީސީން ވަނީ ޑިމޮކްރެޓްސް އުފެއްދުމަށް ވޯޓަށް އަހަން ބައްދަލުވުމެއް ތާވަލުކޮށްފަ އެވެ. މައުލޫމާތު ލިބޭ ގޮތުގައި މި ބައްދަލުވުން ބޮއިކޮޓް ކުރީ މެމްބަރު އަލީ ނަޝާތު އާއި މުހައްމަދު އާސިފް އެވެ.

ކުރިންވެސް ޑިމޮކްރެޓްސް އުފެއްދުމަށް އީސީގައި ބައްދަލުމެއް ބޭއްވި އެވެ. އެބައްދަލުވުމުގައި ޕާޓީ އުފެއްދުމުގެ ހުއްދަ ދިނުމާއި ދެކޮޅަށް ވޯޓު ދެއްވީވެސް ނަޝާތުއާއި އާސިފް އެވެ. އީސީގެ ރައީސް ފުއާދު ތައުފީގު ވިދާޅުވެފައިވާ ގޮތުން މިއަދުގެ ބައްދަލުވުމަށް ދެ މެމްބަރުން ހާޒިރު ނުވާނެ އުޒުރެއް ވިދާޅުވެފައި ނުވެ އެވެ.

ނަޝާތު އެންމެ ފަހުން ވިދާޅުވީ ފުއާދު ހުންނެވީ ނުފޫޒެއްގައި ޖެހިވަޑައިގެންނެވެ. އެހެންވެ ޑިމޮކްރެޓްސްގެ ފޯމުތަކުގެ ސައްހަކަން އަލުން ކަށަވަރު ކުރަން ބޭނުންވެ އެވެ. އަދި އިދާރީ ކަންކަންވެސް ނިންމަން ވަގުތު ނަގާނެ ކަމަށް ނަޝާތު ވިދާޅުވި އެވެ.

މައުލޫމާތު ލިބޭ ގޮތުގައި ނަޝާތުއާއި އާސިފް އީސީގެ ބައްދަލުވުން ބޮއިކޮޓް ކުރީ ކޮމިޝަންގެ ރައީސް ފުއާދު ރިޔާސަތު ބަލަަހައްޓަވާތީ އެވެ. ސަރުކާރުންވެސް ފުއާދު ރައީސްކަމުން ދުރުކުރުމުގެ މަސައްކަތްތަކެއް ފަށާފައިވާކަމަށް ވާހަކަތަކެއް ދެކެވެ އެވެ.

ޑިމޮކްރެޓްސްގެ ބައެއް ބޭފުޅުން ތުހުމަތު ކުރައްވާ ގޮތުގައި ނަޝާތުއާއި އާސިފް ހުންނެވީ ސަރުކާރުގެ ސިޔާސީ މަސްލަހަތު ދިފާއު ކުރައްވައިގެންނެވެ. އެގޮތުން ފޮރިން މިނިސްޓަރު އަބްދުﷲ ޝާހިދުގެ ސީދާ އޯޑަރު އެ ދެބޭފުޅުން ނަންގަވާކަމުގެ ތުހުމަތު ކުރެވެ އެވެ.

ރިޔާސީ އިންތިހާބަށް ތިން މަސް ދުވަހަށް ވެފައިވާއިރު ޑިމޮކްރެޓްސް އުފެއްދުމުގެ ހުއްދަ އޭގެ ކުރިން ދޭނެކަމަކަށް ނުބެލެވެ އެވެ. ގާނޫނުން އީސީއަށް ތިން މަސް ދުވަހުގެ މުއްދަތެއް ދެ އެވެ. އެހެންނަމަވެސް ގަސްތުގައި ދިގު ދެންމުމަކީ ގާނޫނު އަސާސީގެ މަގްސަދާއި ހިލާފު ކަމެއްކަން ގާނޫނީ ބޭފުޅުން ފާހަގަކުރައްވަ އެވެ.