ޢީދުގެ ތަހުނިޔާއާއިއެކު ޤާސިމް އެދިވަޑައިގަތީ ހަސަދައާއި ނަފްރަތުން އެއްކިބާވުމަށް
ޢީދުގައި ގުޅުންތައް ބަދަހިކޮށް އެއްބައިވަންތަކަން އާލާކޮށް، ހަސަދަ އާއި ނަފްރަތުން އެއްކިބާވުމަށް ޖުމްހޫރީ ޕާޓީ(ޖޭޕީ)ގެ ރިޔާސީ ކެންޑިޑޭޓް ޤާސިމް އިބްރާހިމް ގޮވައިލައްވައިފިއެވެ.
ޤާސިމް މިފަދައިން ގޮވައިލައްވައިފައިވަނީ، މިއަދު ފާހަގަކުރަމުން އަންނަ އަޟްޙާ ޢީދުގެ ތަހުނިޔާ ދިވެހިރާއްޖޭގެ އެންމެހާ ލޮބުވެތި ރައްޔިތުންނަށާއި، ދުނިޔޭގެ އެކިކަންކޮޅުތަކުގައިވާ އެންމެހާ މުސްލިމުންނަށް އަރިސްކުރައްވައި، ފޮނުއްވި މެސެޖުގައެވެ.
ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރުކަން ވެސް ކުރައްވާ ޤާސިމް ވިދާޅުވި ގޮތުގައި، ޢީދުގެ އެންމެ މަތިވެރި މަޤްޞަދަކީ، އެކަކު އަނެކަކަށް މަޢާފްކޮށް ހިތްހެޔޮކުރުމެވެ.
އަދި ޒަތީ ޙަސަދަ އާއި ނަފްރަތުން އެއްކިބާވެ، އަޚުވަންތަކަމުގައި ދެމިތިބުންކަމަށާއި، ރުޅިވެރިކަމާއި އަނިޔާވެރިކަމުން ދުރުހެލިވެ، ރަޙްމަތްތެރިކަމާއި އޯގާތެރިކަމާއެކު، އެންމެން ގުޅިގެން ދިރިއުޅުމުގެ ހިތްހަމަޖެހުން ހޯދުންކަމަށް ޤާސިމް ވިދާޅުވިއެވެ.
ޢީދުގެ އުފަލުގައި މުޖްތަމަޢުގެ އެންމެން ބައިވެރިކޮށް، އިސްލާމީ ރިވެތި އަޚްލާޤީ މިންގަނޑުގެ ތެރޭގައި އުފާ ފާޅުކުރުން ކުރިޔަށް ގެންދިއުމަށް. އެންމެންގެ މެދުގައި ގުޅުންތައް ބަދަހިކޮށް އެއްބައިވަންތަކަން އާލާކުރުމަށް. މާތް ރަސްކަލާންގެ އަޅަމެންނަށް ބާއްޖަވެރިކަން އިތުރުކުރައްވައި އެއްބައިވަންތަ ބައެއްގެ ގޮތުގައި ލަހައްޓަވާށި.
ޤާސިމް އިތުރަށް ވިދާޅުވީ މި މަތިވެރި ޢީދަކީ ދޭދޭ ގުޅުންތައް ބަދަހިކޮށް ޢާއިލާގެ މެދުގައި ކުލުނާ ލޯބި އިތުރުކޮށްދޭ މަތިވެރި ފުރުޞަތެއް ކަމަށެވެ. މި އުފާވެރި ފުރުޞަތުގައި އިސްކަންދޭންވާނީ ތިމާގެ އަމިއްލަ ނަފުސަށް ހެޔޮއެދޭ ފަދައިން، އަނެކުންގެ މަޞްލަޙަތާއި ޙައްޤުތަކަށް އިޙްތިރާމް ކުރުމަށް ކަމަށް ޤާސިމް ވިދާޅުވިއެވެ.
