"މި އުޅެވެނީ ހިންނަވަރު އިބްރާހީމްގެ ރަށެއްގަ ބާ؟"

މާލެ ސަރަހައްދުން ގޯތި ލިބުނު މީހުންގެ ލިސްޓުގައި ނަން އޮތުމުން، ފާޑުކިޔާ ފަރާާތްތަކަށް ރައްޔިތުންގެ މަޖިލީހުގެ މައްޗަންގޮޅީ އުތުރު ދާއިރާގެ މެމްބަރު މުޙައްމަދު ރަޝީދު ރައްދު ދެއްވައިފިއެވެ.

Ads by Sosun Fihaara

"ބިންވެރިޔާ" ސްކީމްގެ ދަށުން ގޯތި ލިބުނު މީހުންގެ ލިސްޓުގައި، ރައީސް މުޙައްމަދު ނަޝީދުގެ "ދަ ޑިމޮކްރެޓްސް" އުފެއްދުމުގައި އިސްކޮށް އުޅުއްވާ ފަރާތްތައްވެސް ހިމެނެއެވެ. ގޯތި ދިނީ އިންތިޚާބާ ދިމާކޮށް ކަމަށާއި، އެކަމުގައި ސަރުކާރުގެ ނިޔަތް ރަނގަޅު ނޫން ކަމަށް ޑިމޮކްރެޓުން ބުނާތީ، ލިބުނު ގޯތި ދޫކޮށްލުމަށް އެ ޕާޓީގެ މެމްބަރުންނަށް ދަނީ ގޮވައިލަމުންނެވެ.

މި ފާޑުކިޔުންތަކާ ގުޅިގެން މެމްބަރު ރަޝީދު ކުރެއްވި ޓްވީޓެއްގައި ވިދާޅުވީ، އޭނާ ދިރިއުޅުއްވަނީ ރައީސް އިބްރާހީމް މުޙައްމަދު ޞާލިޙުގެ ރަށެއްގައި ނޫން ކަމަށެވެ.

ބިންވެރިޔާ ސްކީމްގެ ދަށުން ގޯއްޗަށް ހުށައެޅި ފަރާތްތަކުގެ ތެރެއިން، 19858 މީހުން ހުށައެޅި، 12794 ފޯމު ވަނީ ޝަރުޠުހަމަވެފައެވެ. އަދި ޝަރުޠު ހަމަވެފައިވާ ފަރާތްތަކުގެ ތެރެއިން ވަކިން ފޯމްހުށައަޅައިފައިވާ ފަރާތްތަކަށް ޖޮއިންޓްވުމުގެ ފުރުޞަތު ދިނުމަށްވެސް ވަނީ ނިންމާފައެވެ.

ބިންވެރިޔާ ސްކީމްގެ ދަށުން ސަރުކާރުން އިޢުލާނުކުރި ލިސްޓްގައި ގޯތި ލިބޭ މީހުންގެ ތެރޭގައި 10314 މީހުން ހިމެނިފައިވެއެވެ. އަދި ލިސްޓަށް ޝަކުވާ ހުށައެޅުމުގެ ފުރުޞަތު ޖުލައިމަހުގެ 15ވަނަ ދުވަހާއި ހަމައަށް ވަނީ ހުޅުވައިލައިފައެވެ.