ރައީސް ނަޝީދު ޑިމޮކްރެޓްސްއާއި ގުޅޭނީ ބޮޑު ޖަލްސާއެއްގައި

އެމްޑީޕީގެ ކުރީގެ ރައީސް މުހައްމަދު ނަޝީދު "ދަ ޑިމޮކްރެޓްސް" އަށް ސޮއިކުރުމަށް ބޮޑު ޖަލްސާއެއް ބާއްވަން އެޕާޓީން ނިންމައިފި އެވެ.

Ads by Hajj Corporation

ރައްޔިތުންގެ މަޖިލީހުގެ ރައީސްކަންވެސް ކުރައްވާ ރައީސް ނަޝީދު ވަނީ ޑިމޮކްރެޓްސް އުފެއްދުމަށް ބޭއްވި ޖަލްސާގައިވެސް ބައިވެރިވެވަޑައިގެންފަ އެވެ. އެއީ އެމަނިކުފާނު ރަސްމީ ސިފައެއްގައި އެޕާޓީގެ ހަރަކާތެއްގައި ބައިވެރިވެވަޑައިގެންނެވި ފުރަތަމަ ފަހަރެވެ.

ޑިމޮކްރެޓްސް އަކީ ރައީސް ނަޝީދުގެ އިރުޝާދުގެ ދަށުން އެމަނިކުފާނުގެ އަރިހުގައި އުޅުއްވާ ބޭފުޅުން އުފެއްދެވި ޕާޓީއެކެވެ. އެޕާޓީން އަންނަ ސެޕްޓެމްބަރު މަހު އޮންނަ ރިޔާސީ އިންތިހާބުގައި ވާދަކުރާނެކަމަށް ބެލެވޭއިރު ރިޔާސީ ކެނޑިޑޭޓަކަށް ވެވަޑައިގަންނަވާނީ ރައީސް ނަޝީދުކަމަށް އޮތީ ބެލެވިފަ އެވެ.

އެހެންނަމަވެސް ރައީސް ނަޝީދު ޑިމޮކްރެޓްސްއަށް ސޮއިކުރާނެ ސީދާ ތާރީހެއް އަދި ހާމައެއް ނުކުރެ އެވެ. ޑިމޮކްރެޓްސް އުފެއްދުމުގެ ޖަލްސާގައި ވާހަކަފުޅު ދައްކަވަމުން ރައީސް ނަޝީދު ވަނީ އެމަނިކުފާނު އެޕާޓީއާއި ގުޅުމަކީ ޝައްކެއްވެސް އޮތްކަމެއް ނޫން ކަމަށެވެ.

ނަޝީދު ވަނީ އަންނަ އިންތިހާބުގައި އެމަނިކުފާނު ވާދަ ނުކުރައްވައިފާނެކަމަށް ދޭހަވާފަދަ މޭރުމަކުން ވާހަކަފުޅު ދައްކަވައިފަ އެވެ. އެހެންނަމަވެސް އެކަން ރަސްމީކޮށް ކަށަވަރެއް ނުކޮށްދެ އެވެ. ވިދާޅުވީ އެންމެ މުހިންމު ކަމެއް ދޭނީ ރައީސް އިބްރާހިމް މުހައްމަދު ޞާލިހުގެ ވެރިކަން ބަދަލުކުރުމަށް ކަމަށެވެ.

ރައީސް ނަޝީދު ވަނީ ރައީސް އަބްދުﷲ ޔާމީންވެސް ވެރިކަމަށް ކުރިމަތިލެއްވުމުގެ ބަދަލުގައި އެކުގައި މަސައްކަތް ކޮށް އެހެން ކެނޑިޑޭޓެއް ހޮވުމަށް ހުށަހަޅުއްވައިފަ އެވެ. އެހެންނަމަވެސް އިދިކޮޅުން ވަނީ ރައީސް ޔާމީނަކީ އެޕާޓީތަކުގެ ކެނޑިޑޭޓުކަން ހާމަކުރައްވައި އެނިންމުން ބަދަލު ނުވާނެކަމަށް ވިދާޅުވެފަ އެވެ.

ރައީސް ނަޝީދާއިއެކު އެމްޑީޕީގެ ގިނަ މެމްބަރުންތަކެއް ވަނީ އެޕާޓީން ވަކިވެފަ އެވެ. މިހާތަނަށް ޑިމޮކްރެޓްސްއަށް ވަނީ 3،500 އަށްވުރެއް ގިނަ މެމްބަރުން ސޮއިކޮށްފަ އެވެ. އޭގެ ތެރޭގައި އެމްޑީޕީގައި އުޅުނު މެމްބަރުން ގިނަ އެވެ.